Guide [Ank 10] Dus Prabhavi Modules

[Zenyth 6,494]

 

Pichle July mein kiye gaye «Disintegration» update ke saath protection modules ka hamare khel mein aagman hua tha. Kareeb ek saal ke baad ab aisa lag raha hai ki Modules acchi tarah se Tanki Online mein bas gaye hain. Har battle mein tarah-tarah ke modules dikhte hain aur LGC modules ke kuch upabhokta bhi ab saadharan modules ka upyog karte hain.

 

Aaj hum dekhenge dus aise prabhavi modules jo aapko kai tarah ki battles aur battles ki kai sthitiyon mein kaam aayenge. Jaahir si baat hai ki ye dus modules “Trio” protection rakhne waale honge.

Modules ka Chunaav

Hamare dus uttam prabhavi modules dekhne se pehle dekh lete hain modules chunte samay kin-kin pehluon ko toulna chahiye. Sabse pehli baat hai jo aap par nirbhar hoti hai. Wo hai ki aap ko khelte samay kin turrets se sabse jyada ‘dar’ lagta hain. Vahi turrets jo aapko sabse jyada baar khelte samay jhatke dete hain aur aapke khel mein badhayein late hain. Aise turrets se protection milna khaas kar mahatvapoorna hota hain.

Lekin, kai baar khelte samay kisi acche khiladi ke kaaran aap uske turret ke baar mein  aisa soch sakte ho. Isiliye ye bhi dhyaan mein rakhna chahiye ki wo turrets aapke har roz ke khel mein, aapke pasandeeda maps mein aur aapke bhoomika par dabaav dalne mein bahot dikhte hon. Battle ke kisi bhi kshan mein jin turrets ki aapke aas-paas hone ki sambhavna jyada ho, unse protection jaroor honi chahiye.

Aakhir kar, kuch aur mudde dhyaan mein rakhne chahiye. Jo aapne module lene ka socha hai, kya uske dono/teeno turrets ek saath khelne ki sambhavna rakhte hain? Kya inn turrets ke saath ek hi range se khiladi khelte hain, ya phir alag-alag? Kya ye module MU karne ke liye uchit hai ya nahi?, ityadi.

Isi ke saath, badhte hain unn dus modules ki taraf!

Griffon T-A

Griffon T-A apne modification ke hisaab se aapke tank ko Shaft, Railgun aur Thunder ke khilaaf khelte waqt suraksha dilata hai. Firebird ka protection hata do to ye Prodigi LGC ke jaisa hi hai. Shaft, Railgun aur kuch had tak Thunder, ye teeno turret lambe antar waale saamnaon mein nazar aate hain aur isiliye Griffon T-A aapko bade maps mein kaafi rahat dega. Iske saath aap Barda, Solikamsk, Kungur ya Monte Carlo jaise maps mein khelo toh aapko accha pradarshan karna aasaan hoga.

 

Mere hisaab se Griffon T-A ka module jaroor khareedein agar aap bade, khule prakar ke maps par khelte ho aur wo bhi jyadatar light hulls ke saath. Shaft aur Railgun dono light hulls ko ek shot mein khatam karne ki kshamata rakhte hain aur Thunder mein light hulls ka jaana-maana dushman hai. Iss module ki prasiddhi dikhaye deti hai, kyonki teen M3 product kits (Touche, Maestro aur Legend) mein iska samavesh hai. T-A ke saath mujhe lagta hai ki aap Griffon T-B (Smoky, Railgun, Shaft) ki or bhi nazar daalein, ismein Thunder ke bajaay Smoky se suraksha milti hai.

Badger T-F
 

Badger T-F iss module ko maine jabse dekha hai tabse hi main isse sabhi modules mein se ek bahot prabhavi module aisa samjha hai aur isiliye wo mere garage ka bhaag hai. Badger T-F aapko Twins, Firebird aur Freeze ke damage se bachata hai, teeno lagbhag kam antar par khelne waale turrets. (Parantu ab bina Stable Plasma alteration ke kaafi Twins thoda antar rakh rahe hain) Teeno ka prati-second damage (PSD) kaafi bada hai aur ve aapke nazdik aa jaye toh bahaar bina mare nikalna mushkil ho jata hai.

 

Iske protections ko dekh liya, aur dekhte hi aapko samajh aaya hoga ki ye chhote maps mein kaafi prabhavi hoga. Polygon CP, Arena CP aur baaki chhote maps ke CP mode mein ye aapko shaktishaali bana deta hai. Product kits dekhein to ye bhi kai ka hissa hai - Striker, Tsunami, Prometheus aur Paladin (jiske Inferno paint ke purane protection se ye module milta-julta hai). Badger T-F ke saath hi Badger T-H accha module hai, kyonki ismein Twins ke bajaay sarv-shresth PSD waale Isida ka protection maujood hai.

Lion T-A

Lion T-A bhi kaafi pichle module jaisa hi hai, kam antar par khele jane waale saamnaon ke liye uttam aur Arena, Polygon, Farm ya Hill jaise maps mein khelne ke liye accha hai. Lion T-A aapke liye Hammer, Twins aur Firebird ke khilaaf protection prastut karta hai. Iske protection Badger T-F/H ke jaise chhote maps tak kam seemit hain.

 

Lion T-A ka module bhi kai product kits mein dikhaye deta hai. Khaas kar ke M2 kits Annihilator aur Pitbull. Inn dono mein Atom paint bhi maujood hai, jiske LGC module par hi Lion T-A adharit hai. Inn do kits ke alawa Lion T-A module Boreas aur Corsair kit ka bhi hissa hai.

Kodiak T-A

Kodiak modules ki khasiyat hai unke bahumukhi tarah ke protection, jinmein alag-alag prakar ke turrets se aap bach sakte hain. Kodiak T-A aisa hi ek gazab ka module hai jo aapko bachata hai Firebird, Thunder aur Railgun ke damage se; shayad Tanki Online ke teen sabse mashhoor turrets. Ye teeno turret alag-alag dhang se, alag-alag prakar ke antar se saamna karte hain aur isiliye ye module aapko kahi bhi kaam aayega, wo Dusseldorf jaisa bada map ho ya phir Highland jaise chhote aakar ka.

 

Kodiak T-A kisi bhi product kit mein paya nahi jata, lekin uske vividh tarah ke bhai dus kits mein paye jate hain. Khaas kar ke Kodiak T-C, jismein Firebird ke badle Twins se protection milta hai. Ye aapko Raiden kit mein dikhega, jiske Emerald paint ke LGC module se hi Kodiak T-A samaanta rakhta hai. Iske alawa Kodiak T-G module bhi dekh lein, jismein phirse Twins protection dala gaya hai lekin Firebird ke bajaay Thunder ka protection nikaala hai.

Shark T-C

Aur ek module jisne mere garage mein rehne ki pratishtha payi. :P Shark T-C aapko Smoky, Thunder aur Isida se suraksheet rakhta hai. Ye protection lagbhag Cedar paint ke LGC module se samaan hain. Shark T-C kewal ek product kit - Avalanche ka hissa bana hai. Do madhyam-range ke turrets aur ek chhote range ke turret se protection hai, jisse ye kaafi had tak sarvaagin hai aisa main maanta hu.

 

Saath hi saath, aur bhi ek kaaran hai jisse mujhe lagta hai ki ye module adhik upyogi ban sakta hai. Agar gaur se dekho to ismein do aise turrets se protection hai jo kai baar ek saath jud ke poore battle mein tabahi machate hain. Jee haan, Thunder aur Isida. Mujhe bharosa hai ki aapne kai sthitiyon mein kisi Thunder Mammoth aur uske peeche chhipe Isida ka saamna kiya hoga aur parajay chakha hoga. Inn dono se ek saath protection hona ye aasaan bana deta hai. Aisa hi upyog waale anya modules bhi hain, jaise ki Ursa T-F (Twins, Isida, Vulcan) ya phir Shark T-F (Vulcan, Isida, Thunder).

Grizzly T-E

Grizzly T-E module aapne jyada suna nahi hoga, lekin meri uske baare mein rai jaroor sun lijiye. Grizzly T-E module aapko Smoky, Freeze aur Ricochet ke khilaaf protection dilaata hai. Cyclops kit aur Firewall kit ke saath aapko yahi module diya jata hai aur inn dono kits ke saath bikne waale Hohloma paint ke LGC module se ye lagbhag samaroop hai. Ab jara turrets ke naam dekho aur socho to module ek theek-thaak sa saamanya module lagta hai.

 

Lekin, agar aap Railgun ka kaafi istemaal karte ho, wo bhi saadharan battles mein, to aapko samajh aayega ki ye teen turrets maano Railgun ke khoon ke pyase, jaani dushman jaise hain. Freeze ka upyog karne waale Railgun ke piche se nazdik aakar fasa dete hain aur doosri taraf Ricochet aur Smoky apne jabardast impact force se Railgun ka nishaana gadbad kar dete hain. To hua na ye module Railguns ke liye yogya?
 

Griffon T-F

Aur ek khaas module. Griffon T-F aapko suraksha deta hai Magnum, Shaft aevam Striker ke damage se. Magnum ek naya turret hone se ye module kisi pichle paint ke LGC module se milta-julta nahi hai, parantu ye ek product kit mein paya jata hai - Gustav kit (Titan, Magnum M3) mein.

 

Mujhe aisa lagta hai ki Griffon T-F module ek Magnum istemaal karne waale khiladi ke jaroorat ke mutaabik hai. Ye aapko Magnum ke daraavne self-damage se bachayega aur Shaft aur Striker se, jinke lasers aapke lambe barrel par nishaana saadh sakte hain. Ye vahi do turrets hain jo aapko suraksheet jagah par rehte hue bhi haani pahuncha sakte hain. Isiliye iss module ko jaroor khareedein agar aap Magnum ka kaafi jyada istemaal karte hon. Saath hi Griffon T-H par bhi nazar daalein, jismein Striker ke badle Ricochet ka protection milta hai.

Badger T-C

Ek aur Badger series ka module. Badger T-C aapki Thunder, Isida aur Freeze se saamna karte waqt raksha karta hai. Do chhote range waale turrets aur ek madhyam-lambe range waala turret se suraksha milne se aap kisi bhi map mein iss module ko apne saath le ja sakte hain aur accha pradarshan kar sakte hain.

 

Badger T-C module ka aap Thunder ka istemaal karte samay upyog karein to aapko apne khud ke turret ke self-damage se suraksha milegi aur Isida aur Freeze ke khiladiyon ki nazdik aakar war karne ki yuktiyon mein se nikalne mein bhi madad milegi. Badger T-C module isiliye Fortress kit mein shamil hain. Fortress ke alawa Badger T-C Firebolt aur Bulldog kit mein bhi milta hai. Ye Alien LGC aur Rustle LGC ke samaan hai.

Badger T-J

Badger T-J hai ek aur accha-sa module jo aapko protection dega Firebird, Isida aur Striker ke khilaaf. Ye khaas kar Striker ka upyog karne waale khiladiyon ke liye bana hua lagta hai. Striker ka self-damage kaafi haanikarak saabit ho sakta hai. Badger T-J module Cosmonaut kit ka hissa bhi hai.

Waise hi aap Badger T-J ko Control Points ke battles mein khelte samay istemaal kar sakte ho. CTF mein bhi ye accha hi hai. CP mode ke liye aur bhi modules uplabdh hain, jaise ki Kodiak T-K (Striker, Freeze, Magnum) aur Grizzly T-L (Striker, Freeze, Hammer).

Spider S-A
 

Mere dus manpasand modules mein se aakhri - Single module Spider S-A. Spider S-A module kai tarahon se anokha hai, ye Mines se suraksha dilata hai, jo ki kaafi had tak Paint Separation Update ke pehle anjaan baat thi. Modules ke aagman ke pehle Mines se protection sirf vishesh paints aur Masters of Parkour (MoP) paint deta tha.

 

Spider S-A jyadatar parkour kshetra mein dilchaspi rakhne waale khiladi khareedte hain. Isse aapka hull Mines ke upar se jate waqt jyada tikta hai aur iske kai saare chittaranjak parinaam ho sakte hain. Aur lambe, aur unche jumps, mazedaar parkour tricks aur bahot kuch. Spider S-A M3 unlock hota hai Lieutenant General par.

 

 

Kya aap mere chunaav se sehmat hain? Aapke manpasand modules kaunse hain? Aap kisi bhi module ko khareedne se pehle kya-kya sochte hain? Jara hume bhi bataiye aur aapki iss lekh ke upar pratikriya bhi jaroor bataiye. Phir milte hain!

 

Credits Wikipedia

 

[MJROCKS05 428]

Great article but you missed out one of the best modules: Kodiak T-F M3.. Ricochet ek bahut hi khatarnak turret hai, double damage ke saath mein use use karke logon ko 4-5 shots mein maar deta hu aur thunder aur railgun toh waise bhi kaafi acche hain hi. Keep up the good work bhai