Other [Ank 1] Tanki Online - Ek Manoranjak aur Lokpriya Khel

[Cyborg 3,189]

 

Iss khel ki lokpriyata aur manoranjan karne ki kshamta ko dhyaan me rakhte huye, main aap sabke liye, aaj ispar apni raay pesh karunga. Iss vividhta se bhare khel se agar aap ek baar mil chuke, to kabhi bhi issey bhula nahi paayenge. Iss tarah ke khel, jo ki aapka man moh lete hain, aur apni yaad aapke dil mein basa dete hain, inhe dhoondna to kaafi had tak asambhav hain magar internet ki iss duniya mein asambhav naam ki koi cheez nahi hoti, ye to aap sabhi maante hi honge, aisa mera maan-na hain. :P Chaliye inn sab cheezon ko khayal me rakhte huye aage padha jaye! :)

Tanki Online, ek badhta hua, lokpriyata ke nikat pahuncha hua ek khel hain jo ki antar-rashtriya sthar par duniya ke har kone ke logon dwara khela jata hain. Iss khel me aapko aisi khoobiya dikhengi jo ki aapka manoranjan bhi karengi aur aapka gyaan bhi badhayengi. Aap is khel me ek tank ka kirdaar nibha rahe hota hain. Ismein khelne ke kaafi tareeke hain, ya to aap apni puri team ke saath khel sakte hain, ya fir aap bas khud apne aap par nirbhar hokar bhi khel sakte hain.

Duniya bhar ke logo se milkar, unse baate kar naye dost bana sakte hain. Aur to aur apne asli dost jinse aap har din apne sheher me milte hain, unke sath milkar ek atoot team bana kar puri duniya ke logo ka samna kar sakte hain. Iss khel ka zyada se zyada anand uthane ke liye apne dosto ke sath khelna, naye dost banana aur kisi sangathan (clan) ka hissa ban jana ati avashyak hain. Aur issey hi dhyaan mein rakhte huye maine bhi apne achche doston ke saath ek clan banaya hain, aur aaj hum sabhi usmein hasi khushi khelte hain, mil julkar, bhain behno waale sampark se ek dusre ke raaz chhupate hain. Agar aapne thoda zyada hi khel liya ho yaa fir aapko khelne yogya koi battle naa mil raha ho, yaa aap boriyat mehsoos kar rahe ho, to bas kisi battle me na jaakar, kisi bhi server mein kisi bhi vyakti se baatein kar apne man ki baat suna sakte hain. Aur aisa karte huye aap mujhe kabhi bhi kisi bhi samay, kisi bhi server par paa sakte hain. ;) Logon se milna julna aur unse baatein karna mujhe bahot pasand hain. Ye bhi naye dost banana ka ek zariya hain. Agar issey bhi aapko achcha mehsoos na ho, to aap is khel ke forum par, yaani ki yahaan, aa sakte hain. Isske darwaaze aapke liye 24/7 khule rehte hain, jaha par aap apne man ke saare naye naye vichaar aur bhaaw jo ki aapki raaye mein iss khel ko behtar bana saakte hain, unhe spasht tareeke se post kar sabko bata sakte hain. Forum par aap adbhut logo se mil sakte hain, aise log jinse aapka maargdarshan ho, aur aapko kisi bhi cheez ki prerna mile. Agar aapke man mein aise vichaar aate hain jo ki tanki se sambandhit nahi hain, to chinta naa karein, unke liye bhi humare paas ek alag section hain. Jo hain 'Off-Topic Section' yaha aap apne man ki saari cheezein bata sakte hain chahe wo Tanki se sambandhit ho ya na ho, yaha par kayi log aapke vichaaro ke upar apne vichaar bhi darshayenge jinse aapko bhi kayi saari nayi cheezein pata chal sakti hain.

Lekin, in sab cheezo ka anand uthate huye aapko bas ek aur choti cheez ka khayal rakhna hain, jo hain, ki aapko ye yaad rakhna hain ki ye ek khel hain, aapke parivaar samaan hain, jiska matlab aapko yahaan par sabhi logo se achche tareeke se, izzat de kar aur le kar baat karni hogi, sabse prem purvak tareeke se vyavahar karna hoga. Abhadra bhaasha ko iss khel mein zara sa bhi nahi saha jaata hain. Agar kisi moderator ne aapko kuch bhi dushkarm karte huye pakad liya to aap apne account ko hamesha-hamesha ke liye bhi kho sakte hain. Sirf kisi moderator se hi darne ki zaroorat nahi, koi aam khilaadi jiske saath aapne bura vyavahar kiya ho aur buri bhaasha mein kuch shabd kahe ho, wo bhi isi forum par, Violations section mein aapke kaam ka ek screenshot post karke aapko ban karwa sakta hain. Issey aapko zyada darne ki bhi avashyakta nahi hain agar aapko vishwas hain ki aapne kuch nahi kiya hain.

Lekin, agar aap ek achche aur mazedaar vyakti hain jo ki bas iss khel ka maza uthana chahta hain aur naye logo se mil unse dosti karna chahte hain, to aapko in sab cheezo se bhaye bheet hone ke koi zarurat nahi hain, kyunki mujhe aap par vishwaas hain ki aap iss khel ko khelenge aur saath hi sath naye aaye khiladiyon ko cheezein samajhne mein sahayata karenge aur sabhi niyamo ka paalan bhi karenge. Aisa karne ka sabse saral tareeka hain kisi low rank server, yaani ki EN5-6 mein jaa kar khiladion ko iss khel ke baare mein apna gyaan baantiye. Ye khel sirf ek khel nahi, balki ek pura ka pura parivaar, ek vishva hain. Ismein aapko har din nayi-nayi chunautiya milengi, jinka saamna karne me aapko anand laabh hoga aur har din ek naya anubhav milega, mera aapse vaada hain ki aapko har din iss khel mein ek jaisi cheez kaafi mushkil se hi milegi... naye khiladi, naye log, naye tank, ek romaanchak yatra aapke liye har din intezaar kar rahi hoti hain.

Agar aap sochte hain ki aap khel kar zarurat ke hisaab se crystals (iss khel ki mudra) kama nahi paa rahe hain aur aapko apke man ki cheez nahi prapt ho paa rahi. To aap asli paison ka upyog karke apne hisaab se cheezein khareed sakte hain aur is khel ka pura anand utha sakte hain. Lekin agar aap is khel me kafi paise laga rahe hain, to kuch log, ladayi bhoomi ke battle chat me aapko kayi saare naamo se bula sakte hain, aur aapko iske sabse zyada anubhav tab hoga jab aap rank up karte hi koi achchi si Product Kit khareed lenge aur uske sath supplies ko prayog mein layenge. Agar aapne aisa kabhi kiya hoga to aapne jaroor ye dekha hoga ki dushmano ke team se battle chat mein, har 1-2 minute baad koi na koi likhega, "haker noob", "noob drugger kid", "buyer noob", "gold?", "noob kidd go away!!", "how you have that?!" aur aisi aur bhi bahot saari cheezein. Iss khel mein "noob" ye shabd ka sabse jyada upyog hota hain, ye to sabhi ko bata hain. Mere khayal se aapko ye sab dekh kar gusse se zyada hansi hi aati hogi kyunki unko ye nahi pata ki thodi si mehnat se wo bhi bilkul aapki tarah hi ban sakte hain. Aisi ghatnaayein aapko zyadatar chhote ranks par hi milti hain, jaise-jaise koi iss khel me anubhavi banta jaata hain ussey ye saari cheezein gyaat ho jaati hain. :P Lekin aap uski chinta na kare. Keval nazarandaaz karke apne khel se manoranjit hote rahe, fir bhi aapko lage ki kisine hadd paar kar di hain to chat ka ek screenshot lekar ussey forum par report kar dijiye.

 

Agar aapko kabhi lage ki apne is game ko maat de di hain, to ratings ke page par jaa kar usme 'Kramank 1' ke khilaadi banne ki koshish kariye aur iss khel me ek jaani maani hasti ban jayiye. Lekin mujhe vishwaas hain ki aapko har din kuch na kuch naya milega aur aap bhi kabhi kabhi majhboor hokar gusse me kisiko ‘noob’ bula kar apne man ki bhadhaas nikalenge (lol xD). Ummeed hain ki aap is khel ko khelenge aur poore man se, tatha niyamon ka paalan karke iska adhik se adhik anand uthayenge aur wo sabhi jo iske baare me agyaat hain unhe gyaat karenge.

Inn sab ke alava, mujhe ye bhi lagta hain ki aap sabhi ko kahi na kahi lag hi raha hoga ki ye khel ab utna mazedaar nahi raha jitna pehle hua karta tha, lekin aisa bilkul nahi hain, ye bas aapke dekhne ka nazariya hain. Agar kisi din aapko samaye mile, to kabhi iss baare mein gehraayi se sochiyega, kya aapko nahi lagta ki ye saare ke saare updates iss khel ke bhale ke liye hi kiye jaa rahe hain? Kya iss khel me sach much ab wo purana maza nahi raha? Agar aapko lagta hain ki ye khel ab bas paiso waalon ka ban chuka hain, to ek baar firse sochiye. Kya paisa kharch karke kisi cheez ko paana uske liye kari gaayi dher saari mehnat se jyada anand labh karayega? To doston, aisa kabhi naa sochiye ki 'Ye khel to ab bakwaas hain, iss mein kya mazaa?' Jis din aapne aisa soch liya, uss din se chaahe iss mein jitne bhi achche avsar ho, jitne bhi achche updates aaye, aap unme hamesha khot nikalte rahenge aur iss adviteeya khel ka kabhi bhi sahi maayne mein aanand nahi le payenge, tatha aapko kabhi santushti praapt nahi hogi. Fir bhi agar aapke man mein aisa kuch hain jo ki aap iss khel ke 'Developers' ko batana chahte hain, to uske 2 tareeke hain. Pehla, hamare community manager, Cedric Debono ko ek forum PM kar dijiye apne man ki baat ko spasht bhaaw se likh kar. Doosra tareeka, 'Game Discussion' ya fir 'Ideas and Suggestions' section mein aap apne man mein aa rahe saare vichaar, achche bhale sab kuch ek jut karke post kar dijiye. Aur mera vishwaas hain kisi na kisi samay par koi na koi developer aapke topic ko padhega aur apni raay ya to wo khud bata dega, ya fir kisi aur helper dvaara aap tak pahoncha dega. Inn sab ke sath main aapse ye bhi kehna chahunga ki iss khel ke anand uthate huye iss Newspaper Section mein bhi apna keemti samay laga kar thoda yogdaan dein aur hume apna samarthan dikhayein, kyunki isse hume kaafi achcha mehsoos hota hain, aur aapke liye naye naye aakarshak lekh likhne ka josh milta hain.



Aasha hain ki aapke man mein bhi kuch aise hi khayal honge! Haalaki mere man mein aur bhi kayi saare vichaar uchhal kood kar rahe hain, magar aaj ke liye bas itna hi. :P Waise, aisa ho hi sakta hain ki aapke paas aur bhi koi bhale vichaar ho jo ki aapko lagta ho ki mai bhool gaya hoon, yadi aisa hain, to unhe kripaya neeche post kariye. Hum unka tahe dil se swagat karenge. Meri or se bas itna hi, aasha hain aapko mera nazariya samajh aaya hoga. Aapse ladayi ke kshetra me mulakaat hogi!  ;)

 

Edited June 14, 2017 by Tofu

[Penguin40 1,714]

Main samjha nahin :( kiyun kay aap nay inti bari text walls likhin hain ;( Ye text walls aghar khatam hon to pura article bohat behtar ho jaye ga

[Cyborg 3,189]

Main samjha nahin :( kiyun kay aap nay inti bari text walls likhin hain ;( Ye text walls aghar khatam hon to pura article bohat behtar ho jaye ga

Text walls ki baat hi kuch aur hoti hai :p

[Guest]

Main samjha nahin :( kiyun kay aap nay inti bari text walls likhin hain ;( Ye text walls aghar khatam hon to pura article bohat behtar ho jaye ga

Lol bhai lol XD

[lnspirational 178]

Kitna time liye itna likh ne ke liye.. :D

[Cyborg 3,189]

Kitna time liye itna likh ne ke liye.. :D

Wo jaanke kya hi kar loge bhai :p

[ToHoYoNTaDa 1,147]

gr8

[DESTROYERcool1 67]

omg ab hindi bhi