Guide [Ank 4] Ek Turret, Anek Roop - Alterations!

[Zenyth 6,494]

 

 

 

September 2016 mein laye gaye gyarah 'alterations' mein pichle mahine aur kuch alterations samavisht kiye gaye. Alterations ki vajah se shayad bhavishya ke battles mein badi vividhata payi jayegi, kyonki hum unse apne turret ka rupantar kar sakte hain. Inn alterations ki aaj hum sameeksha karenge.
 

 
'Alterations' ka Spashtikaran -
 
Alterations ko aap apne turret ka ek atirikt 'prakar' keh sakte hain. Aap alterations ko kabhi bhi equip kar ke apne turret mein uss alteration se mile huye badlaav la sakte hain. Turret ke har ek modification par kam se kam ek alteration unlock hota hai, yaani ki alterations bhi M0, M1, M2 aur M3 aise paye jaate hain. Abhi ke liye sirf M1 aur M2 alterations uplabdh hain. M1 alteration 50,000 crystals aur M2 alteration 100,000 crystals se aap kharid sakte hain. Aap alterations ko kiraye par bhi le sakte hain - 1 USD ke saath ek hafte ke liye.
 
Alterations se huye badlaav aap ke turret ke parameters mein badlaav hote hain (haalaki developers sirf 'visual' alterations ka bhi samavesh karne waale hain). Alterations ko aap apne turret ko alag-alag paristhitiyon mein fayde ke liye ya phir apni khelne ke andaaz sahayta dene ke liye jod sakte hain. Aap ek hi samay par ek se jyada alterations ka bhi prayog kar sakte hain, lekin ve sab alag modifications ke ho, tab hi. Iss ke alawa, alterations XT turrets pe nahi jode jaa sakte.
 
Toh chaliye, ek ke baad ek sabhi alterations ko dekhte hain. Iss baar hum 6 turrets: Thunder, Railgun, Smoky, Vulcan, Hammer aur Shaft ke alterations dekhenge.
 
Thunder
 
Armor-Piercing Ammo (M1)
 
'Armor-Piercing Ammo' alteration ki vajah se Thunder ka splash damage hat jaata hai. Usi ke saath, self-damage ki sambhaavna bhi chali jaati hai. Iss ka matlab hai ki iss alteration ka upyog aap bahot chhote maps ya phir kaafi 'khule' maps par acche se kar sakte hain. 
 

 
Parantu, splash damage gayab hone se aapko kaafi bada nuksaan bhi hota hai, kyonki Thunder ki mazbooti chhipe hue dushmano aur ek saath khade hue dushmano ko mar girane mein hi hai. Phir bhi, shayad Desert jaise maps mein ye alteration upyogi paya jayega. 'Self-damage' ke na hone se aap aaram se Ping Pong ya Hill jaise maps par bhi khel sakenge. 
 
Lightweight Ordinance Autoloader (M2)
 
Thunder ke iss M2 alteration ki vajah se min. aur max. damage 20% ghat jaata hai par turret ko santulit karne ke liye reload 20% ghat jaata hai. Iss ka matlab hai ki ye alteration equip karne ke baad aap ka Thunder jyada vegvaan ho jaata hai, jiski vajah se uska pratisecond damage badh jaata hai. 20% kam damage ki vajah se M4 Thunder ko iss alteration ki vajah se M4 medium hull ko mar girane ke liye jyadatar panch shot lagte hain.
 

 
Iss alteration ka upyog aapko unn paristhitiyon mein karna chahiye jab aap apni team ke saath ek hi ilaake par war kar rahe ho, jaise ki Polygon CP, Arena CP ya phir Kolhoz CP jaise battles. Inke alawa, jidhar aap dushmano par jald se jald tivrata se hamla karne ki bhoomika (thodi bahot ek Smoky ki jaisi bhoomika) kar rahe hon, udhar ye upyogi hain. Lekin agar aap mano CTF mein Thunder ke saath khud hi hamla kar rahe hon to aap ko ye alteration jyada pasand nahi aayega, kyonki iss ki vajah se aapko kills ke liye jyada shots lagenge. DM battles mein bhi ye kaafi had tak upyogi hoga, kyonki aap acche firing rate ka upyog kills churane ke liye aur jyada kar sakenge.
 
Agar aapne Lightweight Ordinance Autoloader aur Armor-Piercing Ammo ye dono alterations ek saath istemaal karne ki thaan lee to aapke Thunder ki khel-shaili Smoky jaisi ho jayegi. Reload kam, isliye raftaar ke saath hamla, aur splash damage bhi nahi. 
 
Railgun
 
Faster Horizontal Tracking (M1)
 
Railgun ke iss M1 alteration ka prabhav Railgun ke turning speed aur auto-aim angles par hota hai. 'Faster Horizontal Tracking' se turning speed 30% badhti hai aur isi ke saath dono disha ke auto-aim angles kam ho jaate hain. Agar aapka tank sthir khada ho, toh iss alteration ko equip karne ke baad aap sirf 4.9° tak upar aur 7° tak niche ki taraf dusmano ko shoot kar sakte hain.

 

 
Meri raay hai ki aap ye alteration na lein, agar aap jyadatar XP/BP battles khelte hain. Ek to XP/BP mein alterations nahi chalte, aur doosra ye ki saadharan battles mein iss naye turning speed ki aadat dalna mushkil hoga. Phir bhi, agar aap M1 ya M2 Railgun ka upyog karte hain, to aapko adhik turning speed kam aa sakta hain. Magar auto-aim ke angles kam hone se, aap ko aage-piche ho kar hi jyada shots lene padenge. Anyatha aapko Sandbox aur Desert jaise sapat maps mein jyada khelna hoga.
 
Shell Stabilization (M2)
 
Shell stabilization namak iss M2 alteration se Railgun ka minimum damage thoda badhta hai aur maximum damage thoda ghat-ta hai. Matlab agar hum M4 Railgun ka udaharan lein - minimum damage 800 se 50% badhta hai, aur maximum damage 1600 se 25% kam hota hai, yaani ki M4 Railgun Shell Stabilization ke saath hamesha 1200 hp ka eksamaan damage dega. 

 

 
Iss alteration ki vajah se aap har ek hull ko nasht karne ke liye kitne shots lagenge ye jaan sakenge, jaise Mammoth ya Titan ke liye do shots. Iss prakar se aap ka har ek shot ummeed ke mutabik hoga aur aap doosri baaton par jyada dhyaan de sakenge. DM aur TDM ke liye bahot labhdaayi.
 
High-Caliber Ammo (M2)
 
Railgun ka anokhapan? Railgun aisa pehla turret hai jisko do M2 alterations uplabdh hain. Ye doosra M2 alteration bhi Railgun ke damage ke vibhajan ko badalta hai. Issey Railgun ka minimum aur maximum damage 40% se badh jaata hai. Inn dono badlaavon ka parinaam aise hota hai ki aapka average prati-shot damage kaafi badh jaata hai. Iss alteration ki kami ye hai ki aap ka reload time 1.5x ho jaata hai. High-Caliber Ammo ke saath M2 Railgun ka reload ~7 sec, M3 Railgun ka reload ~6.5 sec aur M4 Railgun ka reload 6 sec ho jaata hai.

 

 
Aap keh sakte hain ki iss alteration ko equip karne se kis kadar aap ko pichle saal ke balance update se pehle ki Railgun mil jayegi. Kul milaake, saadharan battles mein agar aap ko kam shots mein kills chahiye, taaki aap jyada samay suraksheet jagah rahe, to ye alteration aap ke liye hai. Mujhe lagta hai ki aise maps jinme chhipne ke liye anek props hain, unme ye alteration theek-thaak rahega, aur baaki maps, jinme aap ko shaktishaali prati-shot damage lagega, tab ye alteration faydemand hoga.
 
Aap Shell Stabilization ya phir High-Caliber Ammo alteration ke saath Faster Horizontal Tracking alteration bhi mishrit kar sakte hain. Inn dono mein se ek alteration ko Faster Horizontal Tracking ke saath equip karne se vishesh koi farak nahi padega, sirf adhik turning speed aur kam auto-aim angles mehsoos honge.
 
Smoky
 
Assault Ammunition (M1)
 
Smoky ka ye Assault Ammunition alteration naam se honhaar lagta hai, lekin mujhe lagta hai ki ye sauda itna bhi accha nahi hai. Ye aap ke shots ko 30% jyada impact force dilaata hai, lekin aap ko iske badle critical hit ke saath samjhauta karna padta hai. Bina critical hit ke hi khelna naamumkin to nahi, lekin bahot kathin ho sakta hai, lekin agar aap Smoky ka upyog karne mein maahir hain to ye impact force ka bharpur istemaal kar ke aap dushmano ka jeena mushkil kar sakte hain.

 

 
Ye 30% impact force ka sahi tareeke se upyog karna mahatvapurna hai, jissey ye alteration aap ke liye anukul hoga. Varna aap ko iss alteration ka thoda sa bhi upyog nahi hoga. Yaad rakhein, aap ke shots ki disha prabhavshaali hoti hai. Dushman ke hull ke baaju ya phir kone ki taraf hi war karein! Agar aap critical hit ke liye pratiksha karna pasand nahi karte, to iss alteration se aap ko mohabbat ho jayegi. :P
 
Precision-Targeting System (M2)
 
Smoky ka ye M2 alteration har tarah ka damage badhata hai, lekin reload ke samay ko 1.4 guna badhata hai. Ye minimum damage ki matra ko 50%, aur maximum aur critical damage ki matra ko 20% adhik kar deta hai. Iss ka parinaam - minimum damage kareeb-kareeb bina-alteration ke maximum damage ke jaise ho jaana. Aise Smoky ka khel thoda bahot Lightweight Ordinance Autoloader waale Thunder jaise hoga.

 

 
Meri maano, ye alteration aap le hi lo, lambe faasle se saamna karne mein bahot kaam aayega. Haal hi ke ek update ke parinaam se ab critical damage doori se ghat-ta nahi hai. Aisa hone se ye alteration aap ko aur dumdaar critical hit or saadharan damage bhi deta hai. Iske saath aap kam shots mein par thodi deri se dushmano par vijay paoge, aur door ke lakshyon ko bhi accha khaasa nuksaan pahuncha sakoge.
 
Dono alterations ek saath? Agar aap Precision-Targeting System aur Assault Ammunition ka ek hi baar mein upyog karoge, to parinaam thoda hatke hoga. Aap ko impact force 30% jyada milega, lekin critical hit gayab ho jayenge. Iske alawa, saadharan shots ke damage ki matra badhi hui dikhegi. Iss prakar se, dono alterations equip karne se, Smoky ka vishesh karya, achanak se jyada (critical) damage pahunchane ka, to chala jayega, lekin Smoky ke do doosre ghatak mazboot ho jayenge.
 
Vulcan

 

Faster Horizontal Tracking (M1)
 
Faster Horizontal Tracking (M1) ye Railgun ke M1 alteration ke samaan hai. Issey equip karne se Vulcan ka turret rotation kaafi tez ho jaata hai. Turret turning slowdown 70% kam hone ka ye parinaam hota hai. Iske alawa iss alteration ka dushparinaam ye hai ki Vulcan ke auto-aim angles 50% se ghat-te hain. Lekin Vulcan ke auto-aim angles pehle se hi bahot sahayyak hone se, iska itna farak nahi padta.

 

 
Turret rotation ki raftaar badhne se Vulcan ko team ke liye yogdaan dene ke naye marg khul sakte hain. Aap iss M1 alteration ke saath Wasp aur Hornet jaise halke hulls ka aasani se vinaash kar sakenge. Map ke baaju se poore map par golibaari aasani se kar sakte hain. Meri samajh ke anusaar ye alteration Vulcan ke liye bahot accha saabit ho sakta hai.
 
Modified Firing Rate (M2)
 
Vulcan ka ye bhi alteration mujhe achha laga. Modified Firing Rate se aap 50% kam samay (adhe second) mein Vulcan se firing shuru ya band kar sakte hain. Iske atirikt, aap ko 50% jyada samay ke liye bina-heating ke golibaari karne ko milegi. M4 Vulcan ke liye ye 9 second ho jate hain, jo kaafi anukul saabit ho sakta hai. Inn dono ke khilaaf, aap ka prati-second damage 25% kam ho jata hai.

 

 

Maine jab ye alteration test kiya, tab mujhe issey kai saare prakar se upyog karne ki sambhavnayein nazar aayi. Ek udaharan hai, rakshak ka - jo dushamano ke hamle par sabse pehle pratyuttar de. Iske alawa, agar aap 'camp' rahe ho aur aap ki jagah se drishtikon kam vistaar ka ho to bhi aap jaldi se firing shuru kar ke nuksaan pahuncha sakenge. Lekin, aisi jagah pe jyada der mat tike rahein, kyonki aap ko lagatar bina-burning ke (M4 ke liye 9 second) firing karne ki kshamata ka bhi upyog karna hai.

 

Chhote antar pe jo dushman hote hain, unpar golibaari karna iss alteration ke saath aasan hoga. Lekin, itna bhi nahi. Socho. Iss alteration se aap ka prati-second damage bhi kam hua hoga, aur Vulcan ka turning speed to pehle se hi nirashajanak hai, isliye. 

 

Vulcan ke M1 aur M2 alteration haath mein haath jaate hain. Faster Horizontal Tracking se tezi se turret rotate karein, aur Modified Firing rate se jald se jald golibaari shuru karein. Short-range ke saamnaon ke liye bahot accha hoga, na? Aur to aur, jaldi bhagte hue dushman aur flag lekar laut-te hue dushmano ke liye aap ka Vulcan sahakarya karega. :D

 

Shaft

 

Assault Emitters (M1)

 

Assault Emitters alteration se Shaft ke arcade shot ka damage 25% se badh jaata hai, parantu 20% se arcade shot ke reload ka samay bhi badh jaata hai. Arcade shot ka mahatva iss alteration ke saath dikhega, kyonki ab jaldi mein kiye hue scope shot se jyada jordaar, M4 pe 875 hp nikalnewaala arcade shot hoga. Shaft ke arcade mode ka reload, jo lagbhag Thunder ke samaan hota hai, wo Assault Emitters ke vajah se 3 second ho jaata hai (M4 pe).

 

 

Mujhe lagta hai ki Assault Emitters heavy hulls pe basey Shafts ke liye itna upyogi nahi hai. Hornet ya phir Hunter se agar aap Shaft ko jodna pasand karte ho, to shayad kuch paristhitiyon mein Assault Emitters aap ko kaam aayega - jaise ki chhipte hue andar-baahar karne waale dushmano se nipatne mein, ya DM mein kills churane ke liye. Lekin phir bhi, 50,000 crystals ka ye sauda munaafewaala nahi lagta.

 

Heavy Capacitors (M2)

 

Heavy Capacitors inn dono mein se jyada uchit sauda lagta hai. Shaft ka ye M2 alteration aap ko 30% jyada damage deta hai, lekin iss baar scope mode mein maare hue shots ko. Dushparinaam ye hai ki aap ke Shaft ki scope mode mein 'energy' bharne ko doguna samay lagega. Iske alawa, scope mode mein aapke turret ki 'horizontal' raftaar bhi 30% kam ho jayegi. Isliye yaad rahe ki aap kam vistaar ya chhote jagaho mein hi jyada khele. 

 

 

PIss badhe hue damage ka parinaam bahot saral hai. Agar aap scope mode mein kareeb-kareeb poora power-up kar lenge, to aap teeno medium hulls ko ek hi shot mein nasht kar denge. Bas vahi nahi, aap ko heavy hulls ko bhi khatam karne mein aasani hogi. Mere hisaab se, agar aap scope shot power up karke dushmano ki prateeksha karnewaale Shaft hain, ya aap map ki mahatvapoorna jagaho pe dhyaan rakh ke laser se unki suraksha karte hain, to ye alteration aap ke liye hai. 

 

Shaft ke dono alteration ek saath kuch jyada vishesh parinaam nahi denge, kyonki M1 alteration arcade shot se sambandhit hai aur M2 waala scope shot se. Phir bhi, agar aap heavy hulls ke saath Shaft pasand karte hain aur arcade shot ka damage badhana chahte hain, to jaroor ye mel kaam aayega.

 

Hammer

 

Slugger

 

Slugger, Hammer ka M1 alteration, September mein nikle hue alterations ke saath aya tha. Issey Hammer ke 'damage cone' ka vistaar ghat-ta hai, 50% chaaro taraf se. Pehla vichaar - jaahir hai, ki iss alteration ke liye accha nishaana lagega. Iss badlaav ke alawa, ye alteration Hammer ka 'rotation speed' bhi 65% (!!!) se ghata deta hai. 65% kam rotation speed ullekhniya lagta hai, aur ye alteration test karne ke baad bhi dhyaan dene laayak laga.

 

 

Par aap ye mat sochiye ki ye Slugger alteration kuch kaam ka nahi hai. Ye jaroor kuch soch ke baad hi banaya hoga na? Jee haan. Aap issey dushmano se thodi doori rakh kar khel sakte hain. Jo ki damage ka vistaar chaaro taraf se kam kiya gaya hai, agar aap ka nishana pakka hoga to aap kuch doori se bhi accha nuksaan pahuncha sakoge. Wasp, Hornet ye phir kai sthitiyon mein Viking bhi, agar map bada ho to, Slugger ke saath acche parinaam dikhayega. Thodi doori rakhne se rotation speed kam hone ki haani bhi kaam hogi. ;)

 

High-Capacity Drums (M2)

 

Maine khud ye alteration khareeda hai. High-Capacity Drums se aap ke Hammer ko 2 atirikt shots milte hain. Poore clip ko reload karne ka samay bhi 35% se badh jaata hai, par agar aap acche se chhipna aur samay par piche hatna sikh gaye, to ye badlaav itna bhi bura nahi lagta. Clip mein panch shots hone se aap bade hi aasani se heavy hulls ka sarvanash kar sakte hain. Lekin kabhi kabhi aap 2 ya 3 shots pe atak jaate ho, tab thodi taqlif hoti hai. 

 

 

Khelte waqt aap ko badhe hue clip ki shakti aasani se mehsoos hogi. High-Capacity Drums se aap Control Points pe apne team ka kabja acche se tika sakoge. Aur to aur, heavy hull upyog karnewaale CTF rakshakon ko bhi mar giraane ki bhoomika aap iss alteration ke saath nibha sakoge. Agar ek samay par aap ke team ko rakshak ki jaroorat hai, to aap Titan ya Dictator ke saath ye alteration liye wo bhi karya aasani se kar sakoge. Keh sakte ho ki iss alteration ke saath aap ka Hammer sahi paristhitiyon mein ek shotgun nahi, to vinaash karne ka yantra ban jayega.

 

Vulcan ke jaise, Hammer ke bhi ye dono alterations haath mein haath jaate hain. Slugger aur High-Capacity Drums ek saath jodne se aap ko dushmano ko thodi door se accha khaasa nuksaan pahunchane ko milega. Agar aap light hull ya Viking ka upyog inn dono ke saath karoge, to High-Capacity Drums ka jyada reload ka samay bhi kam taqlif dega. DM battles mein inn dono ke saath accha score pakka hoga, aise aap bol sakte hain.

 

 

Ummeed hain ki aap ko alterations par meri ye raay upyogi lagi ho. Mein baaki panch (aur shayad chheh) turrets ke alterations ke baare mein bhi jaroor likhunga. Aap ki pratikriya aur sawaalon ka mein intezaar karunga. Phir milenge!

 

Edited June 13, 2017 by Tofu

[asifmak 467]

Bohot badi guide hai bhai kadi mehnat dikh rahi!!

[Zenyth 6,494]

Agar jyada padhna na ho, to sirf jin alterations mein dilchaspi hain, vahi padhein. :ph34r:

[asifmak 467]

Mai bhi smoky ke padhke khisak liya :D

[Antikompanie 160]

bro samavisht  mean/?

[Zenyth 6,494]

^^ it means included