Other [Ank 8] Tanki Helpers ki Bhoomika

[Quincie 531]

 

Aise kai sare khiladi hain jo apne samay sirf Tanki Online khelne mein nahi, balki doosre khiladi acchi tarikey se khel paye aisa chahte houe community ki madad karte hain. Inn khiladiyon ke samooh ko Tanki Online Helpers ke naam se jaana jaata hai. Chaliye jante hain inn khiladiyon ke baare mein.

 

 

Niche hain kuch Tanki Online Helpers ke samooh aur unke baare mein jaankari.

 

Chat Moderators 

 

Inka naam sunke hi inke kaam ka andaza aa jata hain. Ye wo helpers hain jo Tanki Online ke server (lobby) chats ki dekh-bhal karte hain. Inka kaam hain khel ke chats mein sabhi niyamon ka palan karna aur karana. Niyamon ka ullanghan aur logon ka anadar karnewaale logon se ye nipat-te hain. Kisi bhi chat se sambandhit sthiti par inka niyantran hota hai. Inn sthitiyon mein aam khiladiyon ki madad karna bhi unka kaam hota hai.

 

 

Inse judne ke liye inhe aap server chat se public message kar sakte hain. Ye ghanto-ghanto tak server chats ka pehra rakhte hain. Kuch din pehle tak ye forum ke Chat Violations section mein likhi shikayaton par bhi kaam karte the, lekin ab ye prakriya roki gayi hai.

 

Wiki Editors

 

Samay ke saath, din bar din ek ek update aate jaa rahe hai. Forum Mods ke jaise hi, Wiki Editors Official Tanki Wiki ko sambhaalte hai. Har update ke baare mein bataate hai. Agar aap dhyaan de, to aap dekhenge ki har turret, hull, protection module ke baare mein jaankaari milegi Wiki mein. Wiki vahi jagah hai jaha aap har Offical News ke baare mein dekh sakte hai, jaan sakte hai, aur Tanki ke baare mein sab kuch jaan sakte hai. Ek tarah se Wiki Tanki ka gyaan bhandaar hai.

 

 

Chaliye milte hai Wiki Admin se, aur jaante hai unke apne kaam ke baare mein kya vichaar hai.- Wiki Admins Wiki Editors ke jaise hi hote hai, fark itna hi hai ki hamaara kaam hota hai Wiki Editors ko unke jaroorat ki vastuein pradaan karna, aur har cheez ko up to date rakhna. Har wakt koi na koi kaam hota hai, Candidates par dhyaan dene se lekar ek page ko re design karne tak, is kaaran aisa kabhi nahi hua ki mujhe koi kaam na ho. Mai hi baaki saare communities ke Wiki Admins ke saath sampark sthaapit karke ye dhyaan mein rakhta hu ki har Community ka Wiki Up to date hai aur sync mein hai.

 

Battle Moderators

 

Hum sabhi ne ek baar to "Vote Command" (/vote PlayerNickname) ka upyog kiya hain. Par hamari madad ki pukaar kisi ne nahi suni... iska karan ye hain ki Battle Moderators sabse vyast helpers hain. Ye log hamesha ek battle se doosre battle mein jaate rehte hain. Jab kabhi bhi battle ke 25% log vote command ka istemaal karta hain tab inn Moderators ko wo battles highlighted nazar aati hain (aur wo bhi, jinmein ek hi IP se ek se jyaada tanks khel rahe ho). Ye log battle ko rukaye kiye bina battle mein spectator mode se aagman karte hain aur dekhte hain ki jiske khilaaf shikayat thi wo kya sahi mein niyamon ka ullanghan kar raha hain ya nahi.

 

 

Battle Moderators, ya phir BMs, inki vajah se hi aam khiladiyon ko mults aur sabotage karne waale khiladiyon se chhutkara milta hai aur inke 50-60 ghante prati saptah ke kaam ki vajah se hi hum aaram se battles khel sakte hain. Inka kaam kuch desh ki fauj jaisa hai. Janta ki aakhon se door, lekin bahot mahatvapoorna! Aap inke baare mein iss lekh mein aur jaan sakte hain - Battle Mods ka Vishleshan.

 

BMs ke lagatar pehredaari ke beech bhi, durbhagya se, kuch niyamon ka ullanghan karne waale chhoot jaate hain. Lekin, idhar aap bhi unse nipatne ki prakriya mein jud sakte hain. "Game Violations" ke section mein unhe aap report kar sakte hain. Idhar aap gunehgaar ke naam aur gunah ke saboot ko saamne la kar BMs ki bahot madad kar sakte hain. BMs ke kaam ke kuch udaharan dekhein - idhar.

 

Facebook Moderators

 

Agar aapne "Official Tanki Online Facebook Page" ke baare mein nahi suna hai, to accha hoga agar aap uska chayan kar le. Abhi tak iss panne ko 2,46,360 logon ne 'like' kiya hai aur sekdon log isse labh lete hain. Facebook se Tanki ke saath rehna ek bahut hi accha anubhav hai. FB page pe Tanki ke sabhi updates aur khabron ko post kiya jaata hai. Isp Page ko Facebook Moderators ki team sambhaalti hai, aur wo bhi bahut acche se.

 

Yahi log Event Helpers ke saath milkar aap logon ke liye Spardhayein aayojit karte hai. Kisi bhi Update ke baare mein yadi aapke paas koi savaal ho, to aap comments mein poonch sakte hai. Bahut jald uttar mil jayega. Itna hi nahi, aap Personal Message ke dwaara seedhe seedhe in tak pahunch sakte hai. Ek din ke hi andar aapko uttar mil jayega.

 

Forum Moderators

 

Forum Moderators, Chat moderators ki hi tarah ka kaam karte hai. Jaise Chat moderators chat ko sambhaalte hai, inka kaam mein Forum mein ek acha vaatavaran banaye rakhna. Forum Moderators poore Tanki Online Forum ko sambhaalte hai. Unke kayi saare kaamon mein se kuch hai, Archiving, Posts ko badalna, jaroorat na hone par hide karna, Topics approve karna, disapprove karna, Posts/Topics move karna ya hataana, Violated Content wale posts se nipatna, ityaadi.

 

Inmein se hi kuch log kuch vishesh forums ki dekhbhal karte hain. Jaise ki Ideas & Suggestions ke forum par vishisht curators ideas aur suggestions par apni rai dekar unhe developers tak pahunchate hain. Problems aur Solutions ke forum mein bhi ye khiladiyon ki sahayta karne mein lage rehte hain.

 

Help Site Consultants

 

 

Tanki Online ke thode kam jaane-maane lekin mahatva rakhne waale helpers ka samooh - Help Site ki dekhbhaal karne waale. Help Ste consultants help site par likhe prashnon ka uttar likhte hain. Aksar poonche jaane waale prashn aur unke uttar bhi help site ki folder vyavastha mein tikaye rakhne ki jimmedari bhi Help Site consultants ke haathon mein Tanki Online ne thaami hai. Aapke prashno ka uttar sheeghra dena unka kaam hai aur niche diya gaya image unke iss kaam ka saboot hai.

 

 

Newspaper Reporters

 

Agar aap iss lekh ko padh rahe hain to aapko iss samooh ke baare mein jaankari to hogi hi. Reporters, yaani ki patrakaar ye Official Tanki Online Newspaper ke vibhaag mein apna kaam karte hain. Inmein hain English, French, Arabic aur Hindi bhasha mein likhne waale patrakaar. Reporters ye apni kalam se aam khiladiyon ka maargdarshan karte hain, unke liye kahaaniyan, aur naye Specials ke vibhaag ke antargat vistrit update reviews bhi uplabdh karte hain.

 

Iske alawa hote hain jaankari se bhare anya lekh aur pratiyogitayen, jismein khiladiyon ko crystals jeetne ki chunautiyan prapt hoti hain. Saath hi saath, Amateur Writing Section, jo akankshi lekhakon aur kaviyon ke liye jagah hai, uski dekhbhaal bhi Reporters hi karte hain.

 

eSports Moderators

 

Tanki Online jaise bhavya MMO khel ki duniya mein pratispardha ka mausam sabhi taraf hota hai aur isi vajah se TO mein eSports phaila houa hai. eSports yaani ki clans, tournaments (jaise ki aane waali Domination Series II), aur bahut kuch. eSports moderators ka kaam hota hai aise hi tournaments ki shuruaat karna, unki pragati karna aur khiladiyon ko unmein bhaag lene ka protsahan dena aur madad karna. eSports battles mein referee ki tarah nyay karna aur clans ki nigrani rakhna bhi inke kaam ke bhaag hain.

 

 

eSports Moderators ke samooh ki bhi kai vibhaag hain - jaise ki Clan Moderators, Officials, Broadcaster, Commentators, adi. Clan Moderators sabhi clan aur unke clan page par hote kaamon ka dhyaan rakhte hain. eSports Broadcasters apne spectator mode ke saath eSports ki uttam matches ko record karte hain, unhe eSports ke YouTube channel par livestream bhi karte hain. eSports ke commentators unhi matches mein apni awaaz ki madad se videos ka saath dete hain aur battles ki sthiti hume samjhate hain.

 

Designers

 

Designers ek alag hi helpers ka samooh hain. Shayad sabse kalaatmak, kyonki inka kaam hai apni kalakaari ki madad se doosre kshetron ki madad karna, jaise ki Newspaper mein har lekh aur pratiyogita ke upar waale chitra taiyar karna. Designers ka samooh jyadatar Creative League se chuna jaata hai. Inn Designers ki kala pradarshan ke panne jaroor dekh lena. Creative Section ki dekhbhaal karta hai @eragon33, jo ek Designer hai aur Creative League ka administrator bhi. Inke netritva ke neeche Designers, Tanki Online aur uske kai vibhaagon ko apne images aur videos se sundar banate hai!

 

Event Organizers

 

Agar aapne Tanki mein Events ke waapsi ke baare mein nahi suna hai, to aapko Events' section dekh lena chahiye. Mine Hunt, Shooting Range, jaise sparthayein, Crystals kamaane ke ek acha zariyaa hai, asli battle khele bina. Event Helpers' ke team Tanki ko sirf Tanks ko phhodne se zyaada mazedaar banati hai. Event helpers inn events mein khiladiyon par niyantran rakhte hain aur poora event sabke liye ek accha anubhav rahe aur wo bina kisi rok-jhok ke beete ispar khaas dhyaan dete hain. Aapne dekha hi hoga ki aisa karne ke liye ye vishesh Event account ki madad lete hain.

 

 

Sunte hai Event Administrator @Nikk se.

Nikk - Event Administrators ka kaam kabhi kabhi mushkil hota hai, par mazedaar hota hai. Mai apni team ko manage karta hum ye dhyaan mein rakhta hu ki koi pareshaani na ho, Notifications pe dhyaan deta hu, Events link Fb page pe post karna, Event Accounts manage karna, ityaadi mera kaam hai. Haa, mai bhi Events Organization ka bhaag hu, aur kabhi kabhi khud bhi khelta hu, players ke saath ache lamhon ka aanand uthane ke liye.

 

 

To, kya aapko ab sabhi helpers ke baare mein, unke kaam ke baare mein jaankari mil gayi? Ummeed hai ki aapko iss lekh ko padhkar kuch naya sunne ko mila ho. Aapki pratikriya niche dijiye aur dhyaan rahe ki aap inn helpers ko apni taraf se sahayta karne ki koshish karein!

 

Kuch bhaagon mein aur ek guest lekhak ka yogdan.

 

Edited June 13, 2017 by Tofu