Review [Ank 7] Magnum ki Kshamata!

[Cyborg 3,189]

 

Magnum, ek aisa anokha turret jisse istemal karne ke liye aapko kushalta, buddhi, dheeraj, aur sath hi kai aur gunon ki jaroorat padegi. Isse koi farak nahi padhta ki aap Tanki kitne saal se khel rahe hain, iss turret se khelna seekhne ke liye aapko firse ek Recruit banna padega. Iss lekh mein main aapse apni taraf se kuch tippaniyan dunga jisse ki aapke iss turret ke saath khelne par achcha anubhav rahega!

 

---

 

Chaliye shuru karte hain Magnum turret ke baare mein thoda jaan kar...

 

• ​Magnum ki sabse badi kamjori hai, ki ye apne turret daye/baye (left/right) nahi ghuma sakta hai. Turret ko dayi aur bayi disha mein karne ke liye aapko apna poora ka poora hull ghumana padega.
• Turret ghumane ke keys, Z, X aur C ab Magnum ke barrel to upar neeche karne ke kaam aate hain.
• Z dabane se turret upar ki or jayega, X dabane se turret neeche ki or jaayega, aur C dabane se turret apne default 10 ° ke angle par pahunch jayega.
• Space bar ka kaam ismein kuch hadd tak Shaft jaisa hai. Aap usey jitni der tak dabaye rakhenge aapka shot utni hi jyada tezi lekar jayega. Lekin wo kitni door tak jayega wo angle par bhi nirbhar karta hai.
• Iss turret ke barrel ko aap kam se kam 0° aur jyada se jyada 90° tak upar/neeche kar sakte hain. Haan, 90° ka angle yaani aap iss turret se khudko bhi maar sakte hain.

Iss lekh mein main mukhya roop se M3 Magnum ke nazariye se baat karunga, lekin iska matlab ye nahi ki ye aap kisi aur modification ke Magnum se nahi kar sakte.

Ye turret apne aap mein anokha hai. Aap soch rahe honge, kaise? Wo kaaran ye hai, ki Tanki mein bas 2 hi aise turrets hain jismein turret ke visual effects kuch khaas hain, aur unmein 'animated' hisse hain. Aur wo 2 turrets hain Vulcan, jahan par rounds fire karte waqt uska chain ghoomta hai, aur Magnum jahan par shot maarne se uska barrel andar ki or ghus jaata hai, ek recoil ka effect darshaate huye!

 

 

 

Ab gaur karte hain iss turret ki khoobiyon aur kamiyon par, taaki iski kshamata ka kuch andaaza ho sake...

 

Khoobiyan

• Bahot jyada damage karne ki kshamata har shot par
• Game mein sabse bada splash damage ka area
• Impact force ki maatra itni, ki aap kisi bhi tank ka nishaana bigaad sakte hain
• Map ke kisi suraksheet kone se bina nikalkar map se bhi kisi bhi map ke kisi bhi kone mein shoot karne ki kshamata

Kamiyan

• Istemaal karne mein mushkil, iske kathin kaam karne ke tareeke ki vajah se jaise angle aur raftaar set karna
• Bas camping mein kaam aana, aur baaki kisi bhi kaam nahi
• Dheemi reloading ki gati
• Bahot bada self-damage hone ki sambhaavna splash damage ki vajah se
• Iske barrel ko koi bhi Shaft kahi se bhi shoot kar sakta hai agar aapke saamne ke props usse lambe nahi ho to

Ab hum baat karenge kuch jaroori stats ki, jo ki M0 se lekar M4 tak kaafi had tak barabar mahatva rakhte hain...

 

Poori taakat lagane ka samaye - Magnum ko poori tarah se 100% charge par shoot karne ke liye aapko space bar ko 2 seconds tak dabaye rakhe padhega.

 

Set kiya hua angle - Iss turret ki sabse zaroori cheez ye hai ki iska shot aapke diye gaye angle par nirbhar karega poori tarah se. Iska angle aap 0 degree se lekar 90 degree tak upar neeche kar sakte hain, aur iss cheez ko samajhna bahot mushkil saabit ho sakta hai.

 

Raftaar (Power) - Shot ki raftaar iss baat par nirbhar karegi ke aapne uspar kitni taakat lagai thi, yaani ki aapne space bar kitni der tak dabaye rakkha tha. Saara khel iska hi to hai.

 

Splash Damage - Khel mein sabse bada splash damage ka radius isi turret ka hai, aur wo hai 15 meter. 15 meter yaani ki 3 in-game props ki doori tak ye damage kar sakta hai.

 

Ab hum baat karenge sabse jaroori cheez ki, jo hai shoot karne ke tareeke...

 

Magnum ke saath pro jaise khelne ke liye aapko ek cheez apne dimaag mein fit karni hogi, ki ye turret bahot takatwar hai. Aur kaise, wo aapko ab pata chalega.

 

Iss turret ke saath khelne ke liye sabse pehle to aapko ek jagah dhoondni hogi, aur koshish karna hoga ki agar aap kabhi maare bhi jayein to fir chal kar waapas wahan pahunch paayein. Uske baad aapko uss jagah se hisaab se ek sateek angle chunna hoga, aur yahi kaam sabse jyada mushkil hai. Ek sateek angle chunne ke liye aapko 'trial and error' ka raasta lena padega (agar chahiye to private battle mein practice karein!), aur dheere dheere 5 degree ke antar se apne angle badalte rahiye jab tak aapko wo khaas angle na mil jaye jahan se aap poore ke poore map par raaj kar sakte hain. (45° ke angle se aapko sabse jyada range milegi!) Aur jaise hi aapko wo mil jaaye, uss jagah aur uss angle ko yaad kar lijiye. Mubarak ho! Aapne sabse kathin kaam to kar liya hai, ab bas ek chota sa kaam aur reh gaya hai, aur wo hai power set karna.

 

Do samaan power ke shots, lekin do alag trajectory waale shots.

 

 

 

Ye kaam angle set karne se to asaan hai, lekin bahot jyada asaan bhi nahi! Aap apne shot ki power kitni rakhenge wo aap par nirbhar karega, aur iss baat par ki jiss dushman par aap nishana laga rahe hain wo kitni door hai. Sirf yahi nahi, lekin dushman aur aapke beech mein kya props hain ye bhi mahatvapoorna hoga. Agar unche props se gujar ke aap ko shot lena pad raha hai to zaahir si baad hai ki aapko uncha angle rakhna padega. Waise hi, agar nasdik ke dushman par war karna ho to kam angle rakhna labhdayak hota hai, kyonki kam angle rakhne se kam deri mein aapka shot dushman tak pahunch pata hai. Aap har ek dushman tak do angles ki madad se pahunch sakte hain, lekin kaunsa chunna hai wo iss prakar se kai kaaranon par nirbhar hai. Inn dono angles ko jod diya jaye do lagbhag 90° hote hain (jaise ki 30° aur 60°). Ab hum ispar charcha karenge ki aapko kaise nishaane chunne chahiye iss turret se khelne ke liye. 

 

Iss turret se khelne ke liye, aur ek achcha D/L ratio banaye rakhne ke liye aapko do cheezon ka dhyaan rakhna hoga, ki aapko har baar kisi aise jagah par shoot karna hain jahan par kayi saare dushman jhund mein khade ho taaki aapke splash damage se unn sabko chot pahunche jisse ki aapko score milega. Doosra, agar aap isse DM mein khelna chahte hain, to fir aapko aise nishaane ki khoj karni hogi jo heavy hull/medium hulls ka istemal kar raha ho, kyunki inn hulls ki raftaar kaafi kam hoti hai aur inpar nishaana lagana kuch hadd tak asan hota hai. Aur saath hi aapko aise nishaano par dhyaan dena hoga jo camp kar rahe ho, jaise koi Shaft aur Mammoth jo kahin camp kar raha ho. Aisa aapko isiliye karna chahiye kyunki bina hilte dulte nishanon ko maarna bahot asaan hota hai.

 

Ab aati hai baat game modes ki. Magnum CTF aur TDM mein sabse shresth hoga, agar hum sabhi game modes ki tulna kare to. CP aur DM mein bhi ye accha pradarshan kar payega. CP ke liye aise maps jinmein ek hi CP ho ya phir kuch aise CP ho jo door-door ho, to ye unme apna kamaal dikha payega. TDM mein jyadatar suraksheet jagahon se dushman par golandazi karne mein ye maahir hoga. CTF mein iske do kaam ho sakte hai - ek to base ki raksha mein haath batana aur doosra hamlavaron ki sahayta karna, dushman ke base par halla bol ke.

 

 

Aakhir mein, aap ko kaise protection modules ki jaroorat padegi ye dekhte hain. Magnum ke saath aap suraksheet kono se apna kaam kar rahe honge. Agar maps bahot bade ho, to sambhavna hai ki aap tak koi poore battle tak aayega hi nahi. Aise maps mein aap ko doosre Magnums aur splash damage waale turrets se suraksha paani hogi. Thunder, Shaft, Magnum aur Striker ke protection modules aise sthiti mein prabhavi honge. Doosri taraf, agar map thoda chhota/madhyam ho, to kam range waale turrets aap tak samay-samay par pahunch payenge. Aise sthiti mein Hammer, Firebird, Isida, Freeze ya Twins ke protection hi jyada kaam aayenge.

 

Magnum ke saath kaunsa hull?

 

Magnum ke reload ka samay bahot jyada hai, aur iska upyog karte samay badi maatra mein self-damage hone ki bhi sambhavna prakat hoti hai. Iska matlab hai ki light hulls par rakha Magnum kisi bhi map ya game mode mein jyada tik nahi payega. Tezi ka Magnum ke saath mel kuch rang la sakta hai, lekin iska asli roop medium aur heavy hulls ke saath hi maze dilayega.

 

 

Medium hulls mein Viking-Magnum ki jodi sabse awwal hai aisa mujhe lagta hai. Magnum ki visheshta hi hai ki wo upar-niche ke nishaano ko aasani se maar deta hai. Aisa hote hue, hull ki unchayi ka kya kaam? Dictator jaisa uncha hull bhi Magnum ke saath accha pradarshan hi karega, lekin Viking ka aakar bhi chhota hone se ye cover ke piche aasani se chhip jata hai. Ab baat aati hai Hunter ki. Hunter aur Magnum ka upyog bhi jyada alag nahi hai, Viking aur Magnum ke mukaable. Hunter ki turning speed bhi Viking se behtar hai, to jaldi se mudna aasan ho jata hai.

 

 

Heavy hulls, Mammoth aur Titan bhi Magnum ke saath acche parinaam dikha dete hain. Lekin, heavy hulls ke saath jaldi se mudna kathin hota hai. Map ke kono mein hi ye dono jyada acche honge, taaki aapko jyada mudna na pade. Health bahot jaroori hoti hai Magnum ke jaise camper ke liye, aur jyada health hone se aap Magnum aur heavy hulls ke saath medium maps mein bhi khel sakenge. DM mode mein ye sabse shresth honge.

 

Aur aakhir mein hum iss turret ko prayog mein laane ke liye kuch behtareen maps ke baare mein charcha karenge...

 

Iss turret ko aap har ek map mein istemal nahi kar sakte, iska poora fayda uthane ke liye aapko bade maps mein jana padega. Mere hisaab se kuch maps, jo iss turret ke liye bahot achche hain wo hain - Silence, Brest, Highways, Serpuhov, Year 2042, Solikamsk ityadi. Ab aapko kuch andaaza mil gaya hoga ki aapko ye turret kinn kinn maps par istemal karna chahiye. Maps bade hone chahiye, taaki aapka splash damage jyada se jyada asardaar ho, aur saath hi maps mein suraksheet bases aur madhya mein khuli zameen honi chahiye (jaise ki Scope map mein), taaki aap base se andar-bahar karne waale tanks ki shikaar kar sakein. Maps mein koi unche sthaan ho to aur bhi accha. 

 

 

Inhi shabdon ke saath hum iss lekh ke ant tak pahonch chuke hain, batane ko to aur bahot kuch hain. Lekin hum aapko sab kuch batayenge, magar dheere dheere, chhote-chhote hisson mein. Haan, khatam karne se pehle main aapko ek aur tarkeeb bata dunga, wo hai 'camera settings' ke saath hera pheri karna.

 

Ye tarkeeb thodi mushkil hai agar aapka battle joron-shoron se chal raha ho aur aap 1 second bhi bina hile nahi reh sakte. Lekin agar aap camp karna chahte hain kisi shaanti poorn jagah par to ye bahot badhiya saabit hoga. Iss tarkeeb ke liye, aapko ek manpasand jagah par jaakar khade hone hoga, phir 'Q' ko dabaye rakhna hoga jab tak aapka camera bilkul upar na chala jaye. Aur jaise hi wo ho jayega, aap apne keyboard mein dabayein (ek saath) Ctrl + Shift + K, aur ek white color ka console khulna chahiye aapke screen ke left side par. 

 

Wahan type kariye 'vars.set cam_maxmove 0' and enter dabaiye. Uske baad aapke camera upar ki or set ho jayega, jahan se aapko map ka ek bahot achcha nazara dikhega, jisse ki aapko apne dushman dhoonde mein bhi asani hogi. Aur to aur, iss tarah ke camera se aap dushman ke tanks ko aap ke base mein aate waqt dekh payenge aur wo kidhar se aa-ja rahe hain wo aap ke team ko bhi bata payenge.

 

Iss turret mein achchi cheez ye hai ki wo meter jo angle aur power batate hain wo aapke screen par hi rahenge to aapko apne tank to dekhne ki koi jaroorat nahi padhegi. Iss tarah se, mujh par bharosa rakhiye, aapko khelne mein bahot maza ayega aur asani bhi hogi. Lekin agar aap maare gaye, to firse Ctrl + Shift + K dabaiye, aur type kariye 'vars.set cam_maxmove 5' aur enter dabaiye. Fir sab kuch theek ho jayega. Aur ab aapko apni camping ki jagah par jaakar dobara code likhne ki jaroorat nahi, bas Ctrl + Shift + K dabaiye aur UP arrow key aur DOWN arrow keys ki sahayata se apna camera angle badalte rahiye, bina samaye barbaad kiye.

 

 

---

 

To doston, aasha hai ki aapko ye padhke kuch nayi khelne ki tarkeebein pata chali hongi Magnum ke liye. Ab main aap sabko khel mein dekhna chahunga, mere inn bataye huye tarkeebon ko prayog mein laa kar, battle ka rukh badalte huye. Aaj ke liye, meri or se bas itna hi. Alvida!

| 

Credits jate hain @kaisdf, do pictures mein hamari madad karne ke liye!

Edited June 13, 2017 by Tofu

[Guest]

Bahut achi tara se pesh kiya hai. Aur Magnum Baday map jisme zyada walls ho i.e parma aur brest us me hornet key saath bi istmaal kiya jaasakta hai.