Guide [Ank 7] Spardhaon ke liye Maargdarshan

[Zenyth 6,494]

 

 

Namaskaar, aap sabhi paathakon ka swaagat hai. Aaj hum aap ke saamne prastut karne ja rahe hain, Spardhaon (Community Events) mein khelne ke liye maargdarshan. Iss lekh mein aap janenge, ki kis prakaar, Spardhaon ki kathin chunautiyon ka saamna karke aap jeet sakte hain.

 

 

Spardhaon ke Vishay mein...

 

Official Community Events ki shuruaat 2014 mein hui thi. Inhe, us samay Facebook Events ke naam se jaana jaata tha. Kuch samay tak chalne ke baad, achaanak dheere dheere spardhayein ruk gayi. Kayi kaaranon ki vajah se, Spardhaon ka hona asambhav ho gaya.

 

Phir August 2016 mein, @Nikk aur unki team ne, dobaara Spardhaon ko shuru karne ka zimma utthaya. Saath mein, unhe Facebook Moderators ka bhi sahyog mila. Usi samay se, punah ye pratiyogitayein shuru ho gayi. In pratiyogitaon mein bahut badlaav kiye gaye, aur kuch nayi pratiyogitaon ka bhi parichay hua.

 

Aaiye dekhte hai, @Nikk ka is baare mein kya kehna hai.

 

@Nikk : Spardhaon ko dobaara EN Community mein shuru karna kathin tha, par mujhe German Community ke mitron ne sahyog diya. Pehle to EN Community Events ko Facebook Moderators aur Administrators chalaate the, par samay ke saath unka chalan bandh ho gaya. Main pehle se hi, German Community Events ka Helper tha, aur mujhe ye sankalpana kaafi achi lagi, isliye maine EN Community mein ise punah shuru karne ka zimma uthaaya. Adhiktar niyamon ka German Community se hi anuvaad kiya hai, isliye kaam aur aasaan ho gaya. Sab kaam khatam hone ke baad hamne iski pareeksha lee, Cedric Sir ne ise sweekaar kiya aur ab ye safal saabit ho rahe hai.  :)

 

In Spardhaon mein jeetne se hame Crystals ke puraskaar bhi mil sakte hai.

 

Waise to adhiktar pratiyogitayein bahut hi saral hai, par kuch aisi chunautiyaan bhi hai, jinhe poora karna kathin hoga. Aaiye, unpar nazar daalte hai.

 

[soochna: Hum adhiktar baatcheet ispar karenge, ki spardha ko jeeta kaise jaaye, isliye ham ye anumaan lagaate hai ki aap spardha ke sabhi niyamon ko jaante hai.]

 

1) Mine Hunt

 

 

Naam se hi pata chalta hai, ki hume "Mines" ka shikaar karna hai. Ab ye Mines honge kahaan, ye kisi ko pata nahi hai. Par itna jaroor jaante hai, ki 'teamwork' ke bina in mines ko phhodna sambhav nahi. Kuch Mines ko OMP se bhi phhoda jaa sakta hai. Hum Hammer, Shaft aur Wasp ka upyog kar sakte hai. Mera to yahi sujhaav hai, ki Shaft ka upyog na karein. Hammer asardaar hoga. Hammer se Parkour karna bhi saral saabit hoga. Shaft, kuch samay par asardaar bhi hoga par hamein utna laabh nahi praapt hoga, jitna Hammer se praapt ho sakta hai. Ise jeetne ke liye koi vishesh takneek nahi hai. Agar aap OMP mein maahir hai, to uttam. Agar aapke saath koi hai, to usse bhi uttam.

 

Aap Mines ko aasaani se dhoondh sakte hai aur saath hi saath aap use phhod bhi sakte hai. Mines ko dhoondne ke liye, adhiktar baar gharon ke aas paas dekhiye, kyonki jyaadatar mines udhar hi hote hai. Itna hi nahi, chote chote jagahon mein, khurdari jagahon mein, saath hi billboards ke upar bhi Mines ho sakte hai, to unpar bhi nazar rakhein. Aap ka Parkour jitna acha hoga, mines ko phhodne ka kaam utna hi jaldi hoga. Aap sabhi ko shubhkaamnayein.. Ek bhi mine ko naa chhodna!

 

 

2) Last Man Standing

 

 

Aapko ek pul (bridge) ke bheetar khada rehna hai. Aapki chunauti yeh hai, ki aapko 3 minute tak naa to girna hai aur naa hi phhutna hai. Jo ant tak vahaan par apni raksha akele kar paata hai, vahi vijayi hota hai.
 

Takneeki taur par laabh uthaana yahaan anivaarya hai. Aaapko, Mammoth aur Titan ke alaawa ek aisa Hull chunna hoga, jisse aapka Tank sthir rahein aur aapko koi dhakka na de payein. Mere anusaar Viking ya Dictator ismein asardaar siddh hoga. Ab Turrets mein chunaav aapko karna hai. Koi aisa turret, jo Medium se Long range ka ho, jiske paas Splash Damage ho, jiske reload ka samay jyaada na ho. Jee haan, aapne sahi pehchaana.. Striker ya Thunder! Jee, sahi. Striker ya Thunder hi kaargar siddh honge. Haan, Twins bhi acha saabit ho sakta hai. Aur baaki sabhi turrets apne apne roop se asardaar siddh honge.

 

Ab hamne chunaav kar liya ki hamein kiska upyog karna hai. Ab baari aati hai pradarshan ki. Jee haan, ye sabse mahatvapoorn hai... Shuruaat mein apne aas paas ke tanks ko door kijiye, arthaat unhe mar giraiye. Jab aas paas koi na ho, to Mines par dhyaan dijiye, taaki koi aapko phasaa na sake, Phir door ke shatruon par nazar deejiye. Aapko Har wakt apne Health par dhyaan dena hoga. Aur haan, iss samay aapke paas adhik Supplies (Drugs) ka hona aavashyak hai. taaki samay ke saath saath aapka tank mazboot rahe. Jab keval 3 ya 4 log hi shesh ho, to jo dikhein, unhe mar dijiye, aur aise karte karte aap jeet jaenge! Aap ke liye meri shubhkaamnayein! Jeet kar aaiye!

 

 

3) Mammoth Rush

 

 

Aap ko pata hai, aap ke paas Mammoth aur Isida hoga, aur bhaagnewale khilaadiyon ke paas Railgun aur Hornet.
Aaiye baat karte hai, iss khel ko takneeki taur pe kaise jeet sakte hai. Bhaagnewale khilaadi ki maansikta par nazar daala jaye, to itna pata chalta hai, ki vo aisi jagah par jaega jaha adhik Mammoth na ho. Arthaat, hume bhaagnewale ki chaal ka peecha karna hai, bhagnewale ka peecha nahi karna. Jab teenon oor se use baaki mammoths gher le, chauthi oor se aap jaiye aur use gher lijiye aur khatam kar dijiye.

 

Ye hui baat ki hum, takneeki roop se bhaagnewale ko pakad lete hai.
Par hamesha aisa thodi hota hai? Har waqt bhaagnewala alag hota hai, aur sab ki maansikta bhi alag hogi, nahi? Is liye, hume bas ek hi mantra yaad rakhna hai, vo yeh, ki hume hamesha, aisi jagah par rehna hai, jaha Bhaagnewale ki aane ki sambhaavna sabse zyaada ho. Aisi jagah par rukiye, aur chhupne ki koshish kijiye. Haan, samaj sakta hu Mammoth se chhupna, 10 pehredaaron ke beech mein chhupne ke barabar hai, par aap koshish to kar hi sakte hai.
Jab aapki pakad mein wo aa jaye, to use khatm kar dijiye. Ek bhi Wasp bachna nahi chaiye! Thok do sabhi ko!!!

 

4) Tanki Race

 

Ye Races teen prakaar ki hoti hai, to aaiye ek-ek karke sabhi ko dekhte hai.

 

Tanki Race #1

 

Hornet aur Smoky wala race hai ye. Monte Carlo Map mein hume daudna hai. Iss Race mein sabse mushkil hai, khudke tank ko niyantran mein rakhna. Kyonki hume lagatar, ek second bhi na ruke, apne turret ko ghumaate rehna hai, isliye apne tank par, daudte hue kaabu karna mushkil hai. Aise waqt mein ye tareeka kaam ayega, Aap "Q" ya "Pg Up" button dabaakar, apne camera ko unche angle par le jaa sakte hai. Is se ye fayda hoga, ki aap ye dekh paenge ki aage kya hai. Aise mein ghoomte hue turret ke hote hue bhi aap aasaani se aage bad sakte hai. Is race mein, aur koi kathinaai nahi honi chahiye. Sabse aage aapka naam ho! #TankiRace1

 

Tanki Race #2

 

Is race mein, Twins aur Hunter leke jaana hota hai. Yeh Race "Deathrack" map mein khela jaata hai.
#1 ke jaise hi, aap camera angle ko unchayi par rakhkar khel sakte hai. Baaki takneek #1 ke jaise hi hai.
Sabse aage aapka naam ho! #TankiRace2

 

Tanki Race Extreme

 

Ye thoda sa alag hai. Aap ko Wasp aur Isida lena hoga. Yeh Race, Kolhoz map mein hota hai. Iss Race mein aap Supplies ka upyog kar sakte hai (Yaaaaay!). Aap kisi ko shoot karke maar nahi sakte. Keval mines ka upyog kar sakte hai (Satyanaash!). Double Armor (agar jaroorat ho to Repair Kit) aur Speed Boost ka upyog atyavashyak hai! Iss race mein aap ko turret ghumaane ki jaroorat bhi nahi hai. Aap ko ye dhyaan mein rakhna hoga ki aap ko koi palat na de. Race mein sabse aage rehne ke liye, shuruaat mein hi, mine plant kijiye taaki aap ke peeche wala tank aapki disha na badal de. Ab jaise jaise aap aage jaenge, jab aap ghoomenge, tab ek mine punah plant kijiye, taaki aap ko ye chinta na ho ki koi aur bhi aapki museebatein badha na de. Koodte samay ye dhyaan rakhein ki aap palat na jayein! Bas itna hi, baaki bacha race to jeetne mein bahut aasan hai. Sabse aage aapka naam ho! #TankiRaceExtreme

 

5) Box Collector

 

 

 

 

Is event mein aapko Wasp aur Twins lena hai. Aapki chunauti ye hai, ki aapko Double Damage box pakadna hoga. Massacre ka map hai, isliye ye baat to pakki, ki baaki 19 logon ke hote hue aapke liye ye box pakadna mushkil hoga.. Isliye, dhyaan daalte hai Massacre map pe. Jo dono Drop zones hai DD ke, wo craters ke saamne hai. To ham craters ko ramp banaakar pakad sakte hai. Par ham akele hai nahi, isliye craters ke aas paas bahut bheed hogi. Aapko saavdhaan rehna hoga aur aage badhna hoga. Kaam mushkil hai, par naamumkin nahi. Kuch aisi cheezein hai, jo aap karenge to safal honge.

• Kisi bhi anya tank ko shoot na kare, isse aap ko kick/block mil sakta hai.
• Jaldbaazi karke kisi doosre tank ke oopar na chadh jaaye.
• Box ke girne tak prateeksha kare, agar samay ho, to baaki ke boxes jaise Double Armor or Speed Boost utha leejiye, shaayad kaam aa jaye..
• Aap ki raftaar hi aap ko jeet dilaayegi. Saath hi aap ki chhalang bhi acchi hona chahiye.
• Agar aap lag ke shikaar hai to, maaf keejiye, aapke liye Box pakadna sambhav nahi. "Lag" se bachne ke liye, Event se kuch samay pehle, apne Internet ko ek minute tak OFF keejiye aur dobaara ON keejiye. Is se kuch had tak PING ki pareshaani kam hogi.

Koshish keejiye, ummeed hai aap zaroor safal honge. Iss spardha ke liye aap practice bhi kar sakte hain, kyonki kai servers par ek na ek Massacre map ka battle hota hai jismein log Repair Kit pakadne ki aisi hi koshish kar rahe hote hain. Aap ko shubhkamnayein. Ek bhi box naa chhootne paaye!!!

 

To aaj aapne dekha, ki kuch kathin Spardhaon mein aap kaise baazi palat sakte hai. Mere anusaar, sayyam banaaye rakhna zaroori hai aur saath hi saath, apne aap par vishvaas hi aap ko jeet dila sakta hai. Haan, kuch kismat bhi jaroori hai, par aapka kaushalya hi aapko jitaaega.

 

 

Chaliye, ab mai aapse vidaa leta hu. Agar kisi anya event ke baare mein koi savaal ho, to neeche pooch lijiyega. Padhne ke liye dhanyavaad! Aap ko meri shubhkaamnayein! :)

 

 

~ Guest Writer

 

Edited June 13, 2017 by Tofu

[sre123 595]

Who is this guest writer? :ph34r: