Review [Vishesh] Space Mode Rahega Khel Mein!

[Cyborg 3,189]

 

Jee haan, hum sabko jhatke lage the, aur kyon na lage! Aise Update ki kisi ne kalpana bhi nahi ki hogi (Cedric aur khud developers ke alaawa  :ph34r:). Swaagat hai aap sabhi paathakon ka, is vishesh lekh mein. Chaliye jaante hai ki is Update ko neev mili kahaan se. 

 

 

Pichle hafte hue Livestream mein aadarneeya Community Manager Cedric Debono ne ye ailaan kiya tha, ki 12 April ko Cosmonautics Day ko manaaya jaega. Aur sabse badi baat, unhon ne ye bhi daava kiya, ki Moon Silence Map ek din ke liye wapas aa jaega. Is ailaan ko sunkar aadhe se jyaada log khushi se behosh ho gaye. (Un me se main bhi ek tha.) 

 

Moon Silence ki baat karne se pehle baat karte hai Cosmonautics Day ki. Jee haan, Cosmonautics Day, antariksh mein gaye sabse pehle maanav-nirmit spacecraft Vostok 1, aur usmein savar Yuri Gagarin, inke samman mein manaaya jaata hai. Ye din har saal, 12th April ko Russia aur kuch anya poorv-USSR raajyon mein manaaya jaata hai, aur vishwa mein bhi ye "International Day of Human Space Flight' ke naam se manaya jaata hai.

 

Kadachit Moon Silence ko wapas laane se zyaada achi cheez is manch par nahi ho sakti thi. 

 

Moon Silence ki baat kare, to ham jaanenge ki ye ek bahut hi puraana map tha, jo Tanki Online se nikaala gaya kyonki iski gurutvaakarshan shakti kam hone ka kuch log faayda uthate the. Ab ek din ki baat thi, isliye kuch chote badlaav karne ke baad is map ko laaya gaya. Itna hi nahi, saare maps mein "Space" Mode add kiya gaya. Is badlaav se ham kisi bhi map mein kam hui gurutvaakarshan shakti ka aanand le sakte hai. Is baat se sab bahut khush ho gaye. Par log dukhi bhi the, ki yeh manoranjan sirf ek din ka maalik tha. 

 

Par usi shaam ye ailaan hua, ki Space Mode khel mein rahega. 

Chaliye dekhte hai Cosmonautics Day ke din Tanki mein aur kya khaas hua. 

 

 

 

Space mode ke aane se shayad kisi ne baaki achi cheezon par shayad dhyaan hi nahi diya. Ab hum ne Cosmonautics Day ki baat shuru kar di hai, to chaliye dekh lete hai ki Tanki Online ne iss baar kya naya kiya hai. 

 

Is baar ka Cosmonautics Day yaadgaar tha, kyonki Space mode ka lautke aana sone pe suhaaga ho gaya. Ye samay ham sab ke liye bahut acha beeta hai. 24 ghante maano 24 minute se bhi tez beete. Ab nazar daalte hai hame kya acche-acche taufe mile.

• Pehla aur sabse bada taufa, jiska main shayad chauthi baar zikr kar raha hu, wo hai Space Mode ka lautna. Jaise maine bataaya, Livestream mein yeh announcement ko sunkar sab bahut hi utsuk the ise dobaara dekhne ke liye, kayi saalon baad.
• Vishesh Daily Missions, jinko poora karna aur kathin hoga, saath hi, unke inaam bahut jyaada the.
• Ek dukhad khabar bhi saath aayi hai, wo yeh ki Madness ki sabse nichli sateh ab nahi rahi. Developers ne iska kaaran bataaya hai, bin kaaran is zameen par gir jaana, jo kayi logon ko tang kar raha tha. Ek taraf se yeh accha bhi hai, aur bura bhi. 
• Poore ek din ke liye, har battle mein dugne (2x) battle funds the. 
• Iss baar zyaada cheezon par chhoot nahi thi, par jaise ham sab ne khabron mein suna ki M3 micro-upgrades 50% kam ho gaye hai, un par iss din aur 25% ki chhoot di gayi thi!!!
• Aur hamesha ki tarah, ek Holiday Paint bhi tha, jiska naam tha "Gagarin's Mount". Inke saath the alag theme waale bill boards, flags aur parachutes bhi the. Ab inke saath alag aur sundar gold boxes bhi dekhne ko mile. 
• Planet Earth, Spaceship aur Cosmonaut naamak teen alag taufe bhi game mein the, jo aap apne doston ko badhaiyaan dene ke liye bhej sakte hai. 

Ummeed hai aap sabhi ko is din khel ka bahut aanand aaya.

 

 

Abhi hamne dekh liya ki Space mode ne saalon baad kitne dhoom-dhaam se game mein pravesh kiya. Ab ham is mode ki visheshta dekhte hai. 

 

1) Ek Vichitra Khel Anubhav

 

 

Is mode ko jaldi samaj paana aasaan nahi hai. Kayi dinon ka abhyaas aavashyak hai. Gurutvaakarshan shakti kam hone ke vajah se tank ko niyantran mein rakhna atyant hi kathin hai, par asambhav bhi nahi. XP/BP ko is mode nein atyant ananddaayak bana diya hai. Iss mode mein Wasp aur Hornet hi nahi, lekin Mammoth jaise mazboot hulls bhi jaldi se palat jaate hai. Iske saath hi, ek high recoil waale turret se nishaana lagana bahut kathin ho jaata hai, jaise ki Railgun. Jab aap khud niyantran mein nahi, apne shot ko niyantran mein rakhna to door ki baat hai.  :P 

 

Magar ek baat hai, is mode mein khelne se aapka saadhaaran mode mein nishaana aur bhi sateek ho jayega aur aapke chookne ki sambhaavna kam hogi. Ramps, bridges aadi ke upar se jaate wakt savdhaan rehna hoga, warna kabhi bhi ham udne lag sakte hai aur hamaara shatru hame aasaani se dhoond leta hai aur hamare tank ko phhod deta hai (aur shayad khud bhi flip ho jaata hai). Self-destruct to aap ko aise hi hazaaro baar karna padega. Kuch log kehte hai ki Space Mode sirf Parkour ke liye hai, par mera maanna to ye hai ki agar hum ise thoda waqt de to Space mode mein bhi saksham ban sakte hai. 

 

To phir aise hi ek battle mein kaise khela jaye? Ek tareeka to hai ki aap kabhi bhi na ruke. Jab bhi aap apne hull ko rukne ka ishaara dete hain tab uspar jor lagte hai, jiske prabhav se aap ka hull aage ki taraf jhukta hai. Waise hi accelerate karne ki vajah hull piche ki taraf jhukta hai. Aap agar ruke hi nahi aur samaan tezi se chalte rahe to kam gravity ka kam asar dikhlaye deta hai. Waise hi agar turret se samtal zameen se shoot karein, ya phir seedha hull rakhkar shoot karein to hull kam hilta-dulta hai. Khelte khelte aap ye sab jaan jayenge.

 

2) Gold Box Pakadne ka Anand

 

 

Hamara anubhav kehta hai, ki jab bhi ham gold box pakadne se chookte hai, jyaadatar baar iska kaaran hota hai, koi na koi tank, jyaadatar Dictator, kisi doosre tank ke upar chad jaata hai aur Gold lapak leta hai. Par Space mode mein aisa nahi hoga. Agar aapke paas Wasp aur Firebird hai, tab bhi aap Gold pakad sakte hai. Up Arrow button ko 2 second dabaakar, Down arrow  button ko dabaaenge, to aap Wheelie position mein honge, jisse aap saamne waale tank par aasani se chadh sakte ho. Is mode ki wajah se aapko dhamaakedaar tareeko se Gold Box pakadne mein bhi kaafi madat milegi. Aur agar Gold kisi ramp ke upar hai to wo sone pe suhaaga hai! Us ilaake ko "no-fly" zone banaa do. 

 

3) Parkour mein Aasaani

 

 

Jaise ki ham sab jaante hai ki Space Mode ki kam gravity hame jyaada der tak havaa mein rakh sakti hai (aur Magnum ke shot ko bhi). Iska matlab, agar ham koi recoil wala turret lenge to Parkour mein hame madat milegi. Plasma turrets jaise Twins aur Ricochet ka upyog aise mein uttam hota hai. Team Parkour hi nahi, balki Solo Parkour, arthaat OMP mein kaafi madat milegi is mode mein. Yeh poora khel tank ke santulan ke baare mein hai. Ham kisi tower pe akele pahunch sakte hai, kisi chhote ramp ki madat se. Agar hum Ricochet ko lekar neeche shoot karenge to ham upar jaate rahenge aur aise hum madhyam lambayi ke towers tak akele, bina kisi madat ke pahunch sakte hai. OMP ki baat ho gayi, chaliye jaate hai Team Parkour ki oor. Jee haan, Team Parkour to aur bhi aasaan hoga. Sirf ek Hammer shot aur aap naa jaane kitni unchayi par pahunch jayein. Ab Parkour mein jyaada mehnat nahi lagegi, aur saath hi aap bahut alag stunts kar sakte hai. Jaise 360 degree flips, sandwich, aadi mein sach mein bahut aasaani hogi. 

 

 

Aayie aage badhte hai ki kya kehte hai hamaare kuch khilaadi dost, iss naye Mode ke baare mein. 

 

Prashn: Kripya aap hamein Space Mode ke bare mein apna mat bataiye.

 

- Space Mode bahut acha hai, meri kayi yaadein taaza ho gayi. Main aap sab ko bata du, Space mode ke aane ke baad main sirf vahi khel raha hu. Gameplay ki baat kare to usne ek nayi umang paida ki hai, ek vishesh tareeke ka khel ban gaya hai. Par mujhe ye mode parkour ke liye jyaada acha prateet hota hai. 

 

@beaku - Game play ke lihaaz se dekha jaye to ek naya hi khel ban chuka hai ye, kyonki baaki game se ye thoda sa alag hai. Turret ka recoil ek ehem ansh hai aur agar aap use niyantran mein nahi rakhte to adhiktar samay aap khel mein palte hue hi bitaaenge, khaaskar tab jab map mein dhalaan jyaada ho. Thodi der baad Turret recoil niyantran mein aa sakti hai. Doosri baat, ye mode tez raftaar wale khel, jaise eSports ke liye acha nahi hai. Aur us oor parkour kaafi aasaan ho jaata hai, kyonki kam gravity koodne ko aasaaan bana deti hai. Par usi drishti se ye kathin bhi hai kyonki recoil par niyantran utna aasaan nahi. Ant mein main ye kehna chahunga ki ye Space Mode khel ke liye bahut hi acha hai. 

 

 

To Doston, aaj hamne jaana ki kaise Space Mode hamaare khel ko prabhaavit karta hai. Gold Boxes pakadna kitna aasaan ho gaya hai aur saath hi, Parkour bhi aasaan ho gaya hai. Mere anusaar agar is mode ka uchit upyog hona jaruri hai. Agar aap kisi Hacker ko iska durupyog karte hue dekhte hai, to meri guzaarish hai ki aap use record karke Game Violations section mein Report karein, taaki aapko aur aapke anya doston ko insaaf milein.

 

Ab aap sabse vida lene ka samay aaya hai. Dobaara jaroor milenge ek naye lekh ke saath. Alvida!  ;)

 

~ Guest Writer

 

Edited June 13, 2017 by Tofu

[Zenyth 6,494]

Space mode ke aagman ke avsar ka aap sab ne anubhav to liya hi hoga. Padhiye usi space mode ke baare mein, jo ab khel mein kayam kar di gaya hai!

[I3.R.0 1,700]

Space mode ke vishay mein aane wale prashnon ko apne paas na rakhein, unhe yahaan pooch lijiye. Ham jawaab lekar taiyaar baithe hai :)

[tankerkuldeep 739]

 

 

Idhar chalaa main udhar chalaa,

Jaane kahaaN main kidhar chalaa

arrey phisal gayaa

ye tune kyaa kiyaa.. ;)

 

Edited April 20, 2017 by tankerkuldeep

[tankerkuldeep 739]

Space mode ke vishay mein aane wale prashnon ko apne paas na rakhein, unhe yahaan pooch lijiye. Ham jawaab lekar taiyaar baithe hai :)

K.

 

Mera prash hai Baku n Sapce mode mein khela bhi hai.. :ph34r:

[I3.R.0 1,700]

K.

 

Mera prash hai Baku n Sapce mode mein khela bhi hai.. :ph34r:

Have his skype? You can ask him :ph34r: We do not provide personal information. Thanks

[tankerkuldeep 739]

Have his skype? You can ask him :ph34r: We do not provide personal information. Thanks

Mein bata deta hu nahi khela... :lol:

 

Dusra prashan y guest writer kon hai?

Isne Alvida! to ese likha hai jese Duniya chod kar jaa raha hai...Space mein...XD

[I3.R.0 1,700]

Mein bata deta hu nahi khela... :lol:

 

Dusra prashan y guest writer kon hai?

Isne Alvida! to ese likha hai jese Duniya chod kar jaa raha hai...Space mein...XD

Raaz ki baat hai  :ph34r:

[HAPPSHOT 2,029]

Mast likha hai, devnagri mai kyu nahi likhte?

[I3.R.0 1,700]

Mast likha hai, devnagri mai kyu nahi likhte?

I think it was because Devnagri doesn't blend with the Black background of the Forum. Also, because they want other readers (who know hindi but who cannot read it in Devnagri or Write) to read the articles.

I know you've made a super-good point, but the thing is that they're probably waiting for the Forum's background to change, just like RU forum. Black text on white background in Devnagri will be awesome to read.

Edited March 30, 2018 by I3.R.0