Guide [Ank 2] Apne Base ki Raksha Karna

[Cyborg 3,189]

Namaste doston, aaj main aap sabko ye sikhane waala hoon, ki apne base ko poori tarah se suraksha kaise kari jaa sakti hain. Aam taur par log badi aasani se apne khudke base ko bhool kar dushman se ladne chale jaate hain bina yeh soche samjhe ki uske apne base mein kya ho raha hain. To chaliye ab main aapko batata hoon ki apne base ki raksha karna kitna jaroori hain.



To aap sab soch rahe honge, ki bhala apne base ki raksha karne ke liye main kyu ruk jau? Baaki sab bhi to hain uss kaam ke liye.. Ab mai aapko ye bhi bata deta hoon ki aapki yeh jo soch hain, aapke battle mein baaki sabke dimaag mein bhi yahi chal raha hota hain. Ant mein aapki poori ki poori team score badhane ke chakkar mein flag lene chali jaati hain aur aapka base dushmano ke aane jaane ke liye khaali reh jata hain. Ye dikkat bas drug wars, normal battle tak hi seemit nahi hain, yeh XP/BP mein bhi ek gambhir samasya hain. Iss article ko aage padhiye, aur mai aapko bataunga ki aap apne base ki shreshth roop se raksha kaise kar sakte hain. Agar aap soch rahe hain ki apne base par ruk kar, uski raksha karne se aapko jyada score nahi milega, to aap bilkul galat hain. Main aapko apne anubhav se bata sakta hoon ki aam taur par jo log apne base ki raksha karte hain unhe sabse jyada score milta hain kyunki kuch achche bhale attackers hote hain, voh base par aakar, aapko sammaan dene ke liye kabhi kabhi flag aapko capture karne ke liye de dete hain. Chaliye ab shuru ho jaate hain.

Apne base ki raksha karne ke liye sabse jaroori aur pehla kaam hain, apne base ko achchi tarah se jaan lena. Apne base ko jaan-ne se mera matlab hain, ki apne base ke saare khule jagaho ko pehchaan lena, jaha se aapke dushman, chori-chupe aa sakte hain aapka flag churane. Uske baad aapka sabse mehatvapoorn kaam hain map ke hisaab se sahi equipment le lena. Jaise ki 'Noise' mein Titan/Mammoth aur Twins/Hammer'/Freeze. Rio mein, Titan aur Vulcan/Smoky/Thunder/Ricochet ityadi. Ye udaharan dene ka mera ye lakshya tha ki aap map ke size ke hisaab se hi apna equipment lein. Itna to kar liya, ab iske aage, pehle kaam mein jo aapne khuli jagah dhoondi thee, ab aapko un saari khuli jagahon ko mines ki sahayata se bilkul gher dena hoga taaki dushman ko anjane mein hi zor ka jhatka zor se lage :P Chaliye ab main aapko inn sabke baarei mein achche aur gehre tareeke se batata hoon. Udaharan ke taur par, main sabse zyada jaana maana CTF mode mein khele jaane waale map ki sahayata lunga, jo ki hain, 'Noise CTF'.

Pehla Kadam: Apne base mein ghusne ke saare raasto ko jaaniye

Noise map mein agar aap blue team ke liye khel rahe hain, to aapko apne base mein ghusne ke raasto se zyada, nikalne ke raaston par dhyaan dena hoga.



Lekin agar aap red team ke liye khel rahe hain, to aapko inn raaston ka dhyaan rakhna hoga. Sabse adhik to tunnel ka hi vyavahar hota hain, lekin baaki sthaano ka bhi barabar mahatva hain.



Iss map mein aapko, ek rakshak ke roop mein, bas itni jagahon par hi dhyaan dena hain. Baaki ka kaam aapki team ko sambhal lena chahiye.

Doosra Kadam: Sahi equipment ka chunaav

Theek hain, ab aapne apne base mein ghusne ke raaston aur nikalne ke raaston ko pehchaan liya hain. Ab aapko apne garage se, sahi samaan chun-na hain, taaki, ek rakshak ke roop mein aap apna kaam achchi tarah se kar sake. Noise Map ke blue base mein defend karne ka bas ek chota sa ghera hain jo ki aapko tasveer mein dikhaya gaya hain. Blue base mein defend karne ka sabse achcha equipment hain, Titan/Mammoth ke saath Twins/Hammer/Freeze.



Agar aap red team ke liye khel rahe hain, to aapko inn 2 jagahon ka achche tareeke se dhyaan rakhna hoga, Iske liye sabse achcha equipment hain, Titan/Mammoth aur Vulcan/Hammer/Smoky.



Noise map ke liye bas itne par dhyaan dena, ek rakshak ke roop mein, kaafi hain.

Teesra Kadam: Apne base ko Mines lagakar gher dena

Ab aapne sahi equipment ka chunaav bhi kar liya, ab baari aati hain 'mines' ka upyog karke apne flag aur, ghusne/nikalne ke raasto ko inse gher dena taaki, dushman ke bach kar bhaagne ki sambhaavna naa ke barabar ho jaye. Blue base mein mines lagane ke liye sabse sahi jagah ye saari hoti hain.



Aur Red Base mein mines lagane ki hain to kaafi saari jagah jaise, tunnel, ramps, jumping area, lekin sabse zaroori hoti hain, ye saari.



Agar aapne bahot saarein mines laga diye hain, to aapka dushman aapko chakma dekar bhagne ki soch bhi nahi sakta hain. Lekin agar aapne kuch zyada hi mines ka upyog kiya ho, to mera sujhaav hain ki apne paas ek 'Isida' zaroor rakkhein, anyatha aapki saari mehnat barbaad ho jayegi.

Isi ke saath, 'Noise CTF' mein ek rakshak ka kaam khatam ho jata hain, ab aapki haar ya jeet par ek gehra asar hoga, agar itni mehnat karne ke baad bhi aapko harna pade to ismein kam se kam aapki koi galti nahi hogi ;)

---

Ab main aap sabko bataunga, ki xp/bp format mein apne base ki suraksha kaise karein. Iske liye koi khaas margdarshan to nahi hain, magar haan, kuch cheezein dhyaan dene layak zaroor hain. Xp/Bp mein apne base ki raksha karne ka tareeka apko batane ke liye main 'Barda CTF' map ki upyog karunga, haalaki xp/bp mein har map ke hisaab se aapko apni chaal badalni padti hain.

Xp/Bp mein aapko koi equipment change ki zaroorat to nahi hoti, aur naahi mines ki sahayata lene ki. Ye poori tarah se aapke nishaana lagane ki takneek ke upar nirbhar karta hain. Mera sujhaav hain ki barda mein apne base ki raksha ke liye, dono blue aur red base mein, XP combo ka vyavahar karna chahiye, kyunki ye bahot hi sthir hota hain, aur isse aapko nishana lagane mein madad milegi.



Barda map mein defend karna ke bahot saare tareeke hote hain, aap apne base mein chipkar bhi uski raksha kar sakte hain, aur poore map mein ghoomte huye bhi kar sakte hain. Mai aapko dono tareeko ke baarein mein thoda thoda bataunga.

Blue Base mein raksha karne ke sabse achche jagah ye hote hain,



Aur agar aap apne jagah par se maare gaye hain aur kahi aur spawn huye hain, to aap in jagahon se bhi apne base ko suraksha pradaan kar sakte hain.



Agar aap red team ki taraf se khel rahe hain. To fir aapko in jagahon ko chupne ke liye vyavahar mein lana hoga, taaki aap suraksha mein rahe aur apne base ko bhi mehfooz rakh sakein.



Aur agar aap red base ki suraksha karte karte maare gaye hain, to aap in sthaano ka vyavahar kar sakte hain, apne flag ko bachane ke liye.



Bas agar aap in kuch cheezon ka dhyaan rakkhein, to aap Xp/Bp format mein, Barda map mein apne base ki suraksha karne mein safal ho jayenge. Lekin ye yaad rakkhein ki aapko Xp/Bp mein bas ek jagah kabhi bhi ruke nahi rehna chahiye, aur har waqt hilte rehna chahiye taaki aapke dushman ko aapke aane ki zara se bhi aahat na lage.




Aasha hain ki aap sabko maine, apne khudke base ki raksha karne ke baare mein kuchh gyaan daan kiya hoga. Ummeed hain ki aap mere bataye tareeko ko dhyaan mein rakhte huye apne roz-marga ke battles mein unka vyavahar karenge aur achche parinaam payenge. Lekin saath hi saath ye bhi yaad rakkhein ki Xp/Bp aur Non-Format dono hi badi adbhut cheezein hoti hain, iska matlab ki aapko battle ke hisaab se apne taur tareeko ko badalna ho sakta hain, maine bas aapko kuch buniyadi tareeke bataye hain. Aap sabhi apni apni raay neeche post kariye aur hame apni man ki baat bataiye, kaise aap apne tareeke se apne base ki suraksha kar sakte hain. Meri taraf se bas itna hi, aapse khel me mulakat hogi :)

Edited June 14, 2017 by Tofu

[beaku 2,656]

Bahut accha... beaku khush hua :lol:

[Mr_Wrong_Is_Back 2]

Nice.

[r_Dark_Nightmare5 24]

Bahut accha likha hai

[ToHoYoNTaDa 1,147]

Main to kisi kay base ki raksha karoon ga.

[arnav0506 2,777]

Very, very well written! I'm gonna follow your guidelines. Dhanyawad!

[MSI 1,926]

Nice :D

[shabraiz_super 3]

Kya Yaar Bohut nice!