Review [Vishesh] Striker Turret ka Parikshan

[Cyborg 3,189]

 

Namaste doston! Aasha hai ki aapka naya saal abhi tak kaafi achcha chal raha hoga. Mera vishwaas hai ki aap ab tak jaan chuke honge ki khel mein ab ek naya turret aa chuka hai jiska naam hai 'Striker'. Agar aapke man mein isse jude koi bhi sandeh hain to isse padhne ke baad wo door ho jayenge!

 

---

 

Striker Turret ka Garage Mein Vivaran

 

Ek anti-tank missile launcher jo ki madhyam-lambe range ki ladayi ke liye bana hai. Ye turret yukt hai ek laser ke saath jo isse apne dushmanon par homing missiles daagne mein sahayata karta hai. Missiles apne dhamake ke kshetra mein kisi bhi dushman ke tank ko chot pahoncha sakta hai, aur unhe maar bhi sakta hai, uss dushman ko bhi jo aap par vaar kar raha ho aur aapke kaafi paas khada ho. Ye turret aap kisi bhi hull ke saath istemal kar sakte hain, lekin ek bhaari hull ka hona aapke liye faaydemand hoga, kyunki isse aapko nishana lagane mein kaafi asani hogi.

 

To chaliye ab baat karte hain, iss turret ke baare mein, jaise ki ye kaise kaam karta hai, isse aapke dushman ko kitni chot pahonchti hai ityadi.

 

Turret ka kaam karne ka tareeka

 

Iss turret ke paas, shoot karne ko 2 modes hain kuch kuch Shaft ke jaisa. Pehla mode hai arcade mode, jisme ki aapko bas space bar ko ek baar dabana hai, aur chor dena hai, iss aapke dono taraf ke barrels se baari baari, ek ek missile niklega. Iss mode mein shoot karna aasan to nahi hain, lekin agar aapne iski aadat laga lee, aur isme maahir ho gaye, to fir ye mode aapka pasandeeda mode ban jayega aur aap isse achche achchon ko maar gira sakenge.

 

Doosra mode hai scope mode. Iss mode ka istemaal karne ke liye aapko spacebaar ko dabaye rakhna hai, aur jald hi aapko apne turret ke aage se ek 'laser' dikhayi degi. Uske baad, aapko wo laser, kisi ek dushman ke tank par, kuch der tak banaye rakhna hoga. Jab aap kisi dushman par laser se hamla karenge to wo dushman ek laal rang ke dabbe ke andar aa jayenge aur ek hare (green) rang ka gola dikhega, jab wo poora bhar jaayega, uska matlab hoga ki ab aapka turret uss dushman par chaar-chaar missiles ek saath daag dega, jisse ke uska bachna mushkil ho jayega. Lekin ye hare rang ka gola poori tarah se bharna asaan kaam nahi hai, aapka dushman hilega, kahi chup jayega, to fir aapko dobara se uspar nishana lagane hoga, yahi hain, jo scope mode ka istemal karna mushkil bana deta hai.

 

Turret ki kshamata

 

Ye turret, istemaal karne mein mushkil hain, aur wo bhi kyunki ye abhi naya naya aya hai, aur hum isse khelna seekh rahe hain. Lekin jiss din humne isey chalana achche se seekh liya, uss din ye turret har battle ke liye ek dar sa ban jayega. Kyun? Kyunki iss turret mein itni taakat hai, ki aap iski kalpana bhi nahi kar sakte. Ye turret kisi bhi light hull jaise Wasp/Hornet ko supplies ke saath 1 shot mein aur buna supplies ke saath 2 shots mein maar gira sakta hain. Aur iss turret ke ek missile ke jhund ke paas itni taakat hoti hai ki kisi bhi achhe khaase Medium hull, yaani ki Viking, Hunter aur Dictator ko maar giraye.

 

Striker Turret ki khasiyat

 

Ye turret apne aap mein hi anokha hai. Ye jaise Twins, Shaft aur Thunder ka ek shaktishaali mishran hai. Striker turret apne har missile ke saath ek 'splash damage' karta hai, jo ki bahot door tak bhi jata hai. Jaise maan lijiye ki aap kisi Polygon CP ke match mein hain. Aur aapke saare dushman uss ek point ke taraf kendrit hain, to aap jaldi se apna spacebar dabaye rakkhiye aur kisi ek dushman, jo ki point par hai, uspar nishana lagaye rakkhiye, jaise hi ye turret uss dushman ko lock kar lega, saare ke saare 4 missiles ek saath chhoot jayenge aur seedhe point ke beecho beech lagenge, aur isse point par, aur point ke aas paas khade dushman ke tanks ko gambheer chot lagegi, aur shayad unme se kuch mar bhi jayenge.

 

Ye turret arcade mode mein apne dono taraf ke barrels se baari baari shoot karta hai. Iss cheez ko achche se darshane ke liye maine ek GIF banaya hai jo aap spoiler mein dekh sakte hain.

 

 

 

 

 

 

Aur jaisa ki maine kaha tha, ki iss turret ke paas bilkul thunder jaisa splash damage hai. Aur ye splash damage bhi kaafi takatwar hai, iski madad se aap ek teer se do nishane laga sakte hain ;)

Splash damage ke kaam karne ke tareeke ko samjhne ke liye aap neeche ka spoiler dekh sakte hain. 

 

 

 

 

Agar aapne 'spacebar' ko dabaye rakkha aur kisi dushman par kuch der tak nishana lagaye rakkha to fir uss dushman par chaar-chaar missiles ek ke baad ek maare jayenge, jisse ki uska bachna lagbhag namumkin ho jayega. Maine ye aapko pehle bataya to tha, lekin ab issey ek bar dekh bhi lijiye.  :P 

 

 

 

 

Aasha hai ki aap ab tak iss turret ke baare mein kuch kuch to jaan gaye honge, to chaliye ab dekhte hain ki isey aapko kiss hulls ke saath istemaal karna chahiye aur kin kin maps par khelna chahiye...

 

Maine jab bhi kisiko iss turret ke saath khelte dekha, ya fir usse khud khela. To mujhe bhaari hulls jaise Titan aur khaas kar Mammoth ke saath iss turret ko istemaal karne mein bahot asani hui, aur battle ke parinaam bhi achche aaye, aur kuch bade bade maps, jahan par mammoth ya titan ke saath chalna ya hilna mushkil ho raha tha, wahan par Viking aur khaas kar Hunter ne to mera dil jeet liya. Hunter ki raftaar se main logon par apna nishana lagaye rakh paa raha tha, aur kabhi kabhi unka peecha karke bhi unhe maar paa raha tha, jo ki Mammoth ya Titan ke saath sambhav nahi tha. 

 

Bhaari hulls se faayda ye hota hai, ki aap zyada sthir reh paate hain, aur nishana lagate samaye aapko apne dushman ke waar jhelne mein koi khaas takleef nahi hoti, aur aapki sthirta ki wajah se agar aapke dushman ne aapko shoot kiya bhi ho, to aap zyada hilenge dulenge nahi. Saath hi saath Viking/Hunter se aapko kuch raftaar milti hai, jisse ki aap apne un dushmano ko unke paar jaakar maar payenge jo bas 1-2 pal ke liye apne cover se nikalke aapko shoot karke andar ghus jaa raha ho.

 

To agar mujhe saare hulls ko Striker turret ke saath jodne ke liye number dene ho, to wo kuch aise honge

• Wasp - 2/10
• Hornet 3.5/10
• Viking - 9/10
• Hunter - 10/10
• Dictator - 8/10
• Titan - 9/10
• Mammoth - 10/10

 

Ab baat karte hain maps ki. Ye baat dimaag mein rakhte huye, ki striker ko apne missiles ka jhund chorne ke liye apne dushman par apni nazarein jamani hongi, uss hisaab se Iss turret ke liye sabse behtareen maps wahi honge jo thoda bade akaar ke ho, aur khule khule ho, mera matlab, jahan par dushman ke chupne layak jagah bahot kam ho. Aise kuch maps hain, Polygon, Desert, Magistral, Madness, Skyscrapers ityadi.

 

Iss turret ke saath khelne ki yojna

 

Striker turret ke saath khelne ki yojna banana koi asaan kaam nahi, ye cheez, har hull ke saath, har map ke saath badalti rehti hain. Jaisa ki Viking ke saath, aapko jald se jald apne map mein koi aisi jagah dhundi chahiye jahan se aapke dushman ka base achche se dikh raha ho, aur aap unpar asani se missiles daag sakein. Hunter ke saath aapko poore map mein ghoomte rehna chahiye kyunki aapke paas kaafi achchi raftaar hogi. Aur isse aap apne dushmanon ko dhoond dhoond kar maar sakenge aur unhe pata bhi nahi hoga ki aap hai kahan.

 

Heavy hulls, jaise Mammoth ke saath aap kisi bhi map mein koi aisa kona pakad ke baith jaiye jahan se aap apna, aur bhagya se dushman ka flag bhi. Mammoth ka faayda hai ki aap bahot bhaari honge, to iska matlab ki aapko hilana mushkil hoga, aur aapke paas bahot health bhi honge jiska matlab aap dushman ki maar asani se khel sakenge. Saath hi saath aapke bade kad ki wajah se aap apne team ke logon ke liye suraksha bhi pradaan kar sakenge, Titan ke saath bhi aap kuch aisi hi bhoomika nibha sakte hain, lekin aapko titan ke saath kuch adhik raftaar milti hai, jisse ke aap kabhi kabhi apne dushman ko chakma de sakenge. Aur shayad Striker turret ke saath 'chhipna, aur jaldi se bahar aakar marne' ki tarkeeb ko bhi istemaal kar sakenge.  :P

 

Saaransh...

 

Striker turret, meri raay mein ek aisa anokha turret hai, jo apne andar kamaal ke ajoobe karne ki kshamata rakhta hai. Agar kisi din aapne iski poori taakat ka istemaal karna seekh liya, aur iske saath maahir ho gaye to aap har battle par raaj kar sakte hain. Lekin dimaag mein rakhne ke baat ye hai ki ye turret abhi bhi naya naya aaya hai, aur iski kshamataon mein kuch utaar chadaav hone ki sambhaavna hain. Mere khayal se to iski shakti aur badhai jayegi kyunki abhi iss wakt, iss turret ko poori takaat se chalana bahot mushkil, ya asambhav bhi keh sakte hain. To aap sab ko meri shubh kaamnayein, aasha hai ki aap itna sab kuch padhne ke baad, aapne Striker turret ke baare mein kuch kuch jaana hoga aur iske saath kuch behtar khel bhi payenge.  ;)

 

---

 

To doston, aasha hai ki ye sab kuch padh kar aapne kuch gyaan prapt kiya hoga aur naye Striker turret ke saath kaisa khela jaaye, uske baare mein bhi kuch kuch samajh aaya hoga. Ab main aapka aur samaye nahi loonga, aur ab aap jald se jald naye turret ke saath khelna shuru kar dijiye!

 

 

 

Edited June 14, 2017 by Tofu

[MSI 1,926]

Very interesting to read, Good job!

[Zenyth 6,494]

Ek aur vishesh lekh, Striker turret par ke vichar. 

[Cyborg 3,189]

Very interesting to read, Good job!

So fast  :o