Review [Ank 8] Patch Update #456 ki Sameeksha

[Zenyth 6,494]

 

Namaste doston! Jaante hai, ki iss baar review ko chhapne mein deri ho gayi hai. Hamaare paas samay kam hone ki wajah se ye lekh ek vishesh lekh na hokar mukhya ank ka bhaag ban chuka hai. Iss deri ke liye aap sabhi paathakon se kshama chaahunga. Aaj hum dekhenge ki Patch Update #456 ke ailaan se hamaare khel mein kaise badlaav aaye hai. Chaliye, ek-ek karke un sabhi badlaavon ko samajhte hai.

Upar dikh rahe video mein Mukhya Developer Semyon Strizhak ne baari baari se har turret par ho rahe badlaavon ke baare mein bataaya.



Patch Update 456 ka ailaan aur iska game ke saath milan 21st April ko hua. Aisa update bahut dinon baad nazar mein aaya hai, jismein ek saath kayi turrets mein badlaav hue ho. Iss vistaar ka pichla update hua tha October 2016 mein, jisme har Turret aur Hull mein badlaav kiye gaye the, saath hi, Micro Upgrades, Alterations, Supplies mein badlaav hua aur DR Format ka aagman hua. Iss update ko "Global Update" ka naam pada.

April 21 ke iss update ke anusaar Firebird, Isida, Smoky, Hammer, Striker, Thunder aur Magnum mein badlaav hue, jo kuch iss prakaar ke the:

Firebird:

 

Firebird jis gati se doosre tanks ko jalaata hai, us gati ko 0.2% se 0.4% kar diya hai. Padhne par ismein aisa koi bada badlaav shaayad nazar na aaye (kyonki 0.2% to bahut hi kam hai) , parantu aisa nahi hai. Ye badlaav khel mein bahut antar laata hai. Agar ham vichaar kare ki Firebird ek tank par aag daal raha hai, to ham dekhenge ki har second wo 0.2% se aag ke taapmaan ko badha raha hai. Firebird ke har modification ke paas 1000 J ki Oorja (Energy) hoti hai aur prati second iska istemaal hai 200 J/s. Iska matlab ye hai ki Firebird ke kisi bhi modification ki jo oorja shakti hai, wo 5 second se jyaada tik nahi sakti.

0.2% ke heating rate ke liye 5 seconds ka samay bahut kam hai, jiske kaaran koi bhi Firebird kisi tank ko poori tarah jalaakar apne adhiktam taapmaan tak nahi pahunch sakta. Is update ka nishkarsh itna hi tha ki is heating rate ko badhaaya jaye, aur isi kaaran ab ye heating rate 0.4% hai. Is heating rate se Firebird ke aag ki lapte apne adhiktam taapmaan tak pahunch sakengi, wo bhi aasaani se, isse pehle ki uski saari oorja khatm ho jaye.

 

(Firebird ka heating rate mein badlaav - 0.2% → 0.4% ) → Sakaaratmak

 

 

Alteration - Compact Tanks Mein Badlaav

 

Firebird ke pehle badlaav ke tehet Firebird ke Alteration 'Compact Tanks' mein bhi badlaav hua. Ye Alteration pehle aapke heating rate ko 300% ki badhauti deta tha. Arthaat aapka puraana heating rate, jo ki 0.2% hai, wo badhkar 0.8% tak pahunch jaata (0.2 + 0.2 ka 300% = 0.2 + 0.6 = 0.8%). Lekin kyonki Heating rate ko 0.4% kar diya gaya tha, isliye is alteration mein ab sirf 100% ki badhauti hogi. Arthaat ye heating rate punah ek baar 0.8% tak pahunch jayega (0.4 + 0.4 ka 100% = 0.4 + 0.4 = 0.8%).

Iss badlaav se khel mein koi antar nahi padega, in ankon mein badlaav keval mukhya uttar ko samaan karne ke liye hua tha.

(Alteration Compact Tanks mein Badlaav) → Nishpaksh

Isida:

Isida mein bahut bada badlaav hua tha. Balki do bade badlaav hue the. Pehla, Isida jo prati second damage (PSD) pahunchaata hai, use 19% se badha diya hai aur uska healing rate 45-50% se badha diya gaya hai. Iska kaaran hai ki battles mein Isida bahut hi kamjor ho gaya tha kyonki iski self healing nikal di gayi thi. Isida ko lekar DM ya TDM battles mein logon ko maarna lagbhag asambhav ho gaya tha.

Ab iske PSD ko badha diya gaya hai aur saath hi iski healing rate bhi badh gayi hai. Video mein ne kaha tha ki iski self-healing ko wapas nahi laaya jayega, kyonki iski wajah se Isida ke saath khelna dushkar saabit hota tha. Agar aap battle mein ho, aur Isida Double Power activate kare, to aapke saare supplies vyarth hai, Isida aapko waise bhi hara leta tha. Isida lekar khelne waalon ke to maze the, jaha tank dikh gaya usse health choos lo lekin jo tank Isida ke virudh khelta hai, uski ek hi ranneeti thi, 'Bhai aaj tu Isida se door hi rehna'. Agar aap video ko bhi dhyaan se dekhein, to dikhega ki Isida lagaataar 5 tanks ko phhod deta hai, aur khud to marta hi nahi. Iske kaaran Isida ko "overpowered" ka thappa lag gaya, jo ki sahi nahi tha.

Itne bade badlaav ke baad bhi ye dhyaan mein rakhe, ki Isida ab bhi Tanks ke saamne thoda sa kamjor hoga, kyonki na to ye Firebird ki bhaati Jalaa sakta hai, na to Freeze ki bhaati Jamaa sakta hai. Aur saath hi saath damage karne se iski Oorja jyada tezi se khatam hoti hai, healing ki toolna mein.

 

(Isida ke Damage aur Healing mein badhauti) → Sakaaratmak

 

Hammer:
 

Aap log jaante hai ki Hammer ke pellets doori ke saath bikhar jaate hai. Hammer mein kiye gaye badlaavon ka kaaran, Isida se thoda samaan hai. ne video mein kaha tha, ki Hammer bahut hi shaktishaali ho gaya tha kyonki door se hi ye tanks ko adhik damage pahuncha sakta tha. Iss kaaran se DM battles mein, saath hi CTF mein Hammer prabal rehta tha. Hammer ka high damage aur impact force hi ise battles mein prabal banata tha.

Par agar Hammer ke damage aur firing rate ko ham karne se ye turret jyaada hi kamjor ho jaata. Hammer par kuch naya aazmaana tha. Isliye, Hammer ke pellets ki spread, arthaat jis angle ke saath wo wo bikharte hai, use 7 degree se 10 degree kar diya gaya. Arthaat, Hammer ke saare pellets ko ek tank par nochaawar karne ke liye tank ke kareeb jaana aavashyak ho jayega. Saath hi, Hammer ki maximum damage range ko 10 m badha diya hai. Yaani ki, agar aap ko kaafi antar par khade 2-3 tanks ko maarna ho, to ab badhi hui maximum damage range aapki sahayta karegi, aur aap pellets ke spread ke saath do-teen tanks ko kaafi damage pahuncha payenge.

 

(Hammer ke pellet spread mein badlaav) → Nishpaksh

Alteration - Slugger Mein Badlaav

 

Hammer mein jo do badlaav kiye, unhi ke aadhaar mein Hammer ke Alteration Slugger mein bhi badlaav hua. Slugger aapko bahut hi baareek pellet spread deta tha, par iske badle mein iska rotation speed bahut dheema ho jaata tha. Pehle, agar aapne Slugger equip kiya hota, to Hammer ka rotation speed 65% se kam ho jaata. Par ab, ye 65% se 70% ho chuka hai. Ye 5% ghataana jaroori ho gaya tha kyonki Hammer ke maximum damage range ki badhauti ko balance bhi karna tha.

 

(Alteration Slugger mein Badlaav - rotation speed 5% aur kam) → Nakaaratmak

 

Smoky

 

Smoky ke critical shot ki sambhavna (%) aur critical shot ke damage mein kuch baith-bithaav kiya gaya hai. Kul milaake Smoky ke do avatar honge, ek M0 modification par, jo badalte-badalte doosre tak pahunchega, M4 par. Chhote modifications par critical shot ki sambhavna kam hogi, parantu critical shot ka damage lagbhag dugna hoga. Doosri or, bade modifications, jaise ki M3 aur M4 Smoky ka upyog karte hue critical ki sambhavna kaafi badh jayegi (M0/M1 ki toolna mein) lekin critical damage kuch khaas jyada nahi hoga, saadharan shot se.

 

 Critical damage (hp) | 660 | 685.88 | 727.94 | 744.12 | 770 |

 Critical sambhavna (%) | 5 | 8.53 | 14.26 | 16.47 | 20 |

 

Jaise ki aap dekh rahe hain, critical shot ki sambhavna, jo pehle har modification ke liye ek jaisi thi, wo ab aap MU kar sakte hain. M0 par spawn hote hi critical shot ka chance 5% hai, lekin critical damage hai 660 hp (saadharan shot ki maximum damage hai 330). Doosri taraf, M4 par sambhavna ho jaati hai 20%, lekin critical damage ki maatra hai 770 hp (saadharan shot ki maximum damage se 18.4% jyada). Yaani ki shuruwat ke modifications par critical shot kam lekin mazboot, aur aage badhte hue jyada lekin thode kamjor.

 

Critical shots ka vibhajan alag, lekin ek samay ke dohran damage utna hi. Iska matlab hai ki chhote ranks mein thode shots ganva ke critical shots ko jaldi laana fayde ka kaam hoga. Lekin aage badhte hue, critical shots ka mahatva itna jyada nahi hoga, kyonki wo aane ke liye kam samay rukna padega. Ek aur baat, iss update ka asar Smoky ke M2 Alteration, Precision Targeting System par bhi dikhega.

 

(Smoky ke critical shot mein badlaav) → Nishpaksh

 

Thunder

 

Thunder ke stats mein ek hi chhota sa, lekin prabhavi badlaav laya gaya hai. Ye badlaav hai iske maximum splash damage ke radius mein. Iss radius ki maatra 0m se 1m kar di gayi hai. Iss badlaav se do pehluon mein asar padega - arthat, splash damage, aur self-damage bhi. Agar aap Thunder ka upyog karte hain, to ye aapko khushkhabri hi hai, kyonki 1m. tak aap maximum splash damage kar payenge. Chhote maps ya phir maps ki ghani jagaho mein aap iss splash damage ka bahot accha upyog kar sakoge, aur ab splash damage se aapko pehle se kaafi jyada kills milne waale hain. Sirf self-damage ke baare mein satark rahiye aur chhote range waale turrets aate hi peeche jaakar suraksha paane koshish kijiye.

 

(Thunder ke splash damage radius mein badlaav) → Sakaraatmak

 

Striker

 

Striker mein do badlaav laye gaye. Inmein se ek to theek Thunder ke splash damage radius jaisa hai. Striker ke rockets ka bhi maximum splash damage radius 1m kar diya gaya hai aur iska matlab hai ki ab arcade shot aur khaas kar ke salvo rockets se chhipe hue dushmano par war karna aur unhe nuksaan pahunchana aasaan ho jayega aur jyada natije layega. Doosra badlaav thoda alag hai.

 

Doosre badlaav mein Striker ke rockets ki minimum gati dugni ki gayi hai, 10 m/s se 20 m/s. Iska kaaran hai Striker ke turret ka rachana. Striker ke turret ki dono bajuon se ek-ek karke rocket fire hote hain, lagbhag Twins ke projectiles ke barabar. Iska matlab, agar aap shoot karte hue baju ke taraf badh rahe ho, to aapke dristhikon se aisa lagta hai ki rockets doosri or mudkar curved trajectory ke saath jaate hain. Asal mein ye seedhe hi jaate hain. Iss tarah ke prabhav ko kam karne ke liye rockets ki shuru ki gati badhayi gayi hai, taaki rockets ko maximum gati tak jaane ke liye kam accelerate karna pade. Isse tez hulls par war karna aasaan ho jayega, aur chhote antar par rockets se bachna kam aasaan hoga.

 

(Striker ke dono badlaav) → Sakaaratmak

 

Magnum

 

Magnum ke shooting ki prakriya mein ek badlaav kiya gaya hai. Wo badlaav hai power set karne ki prakriya mein. Power set karte waqt abhi tak 100% power tak jaane ke liye 2 second lag jaate the. Ab ye samay 3 second kar diya gaya hai. Seedhe dekho to ye ek nakaratmak badlaav hai, kyonki aapko har shot lene ke liye kuch samay aur rukna padega. Dushmano ko jawab dene ke liye ye samay kaafi mahatvapoorna hota hai. Usi waqt, aapko power set karne mein aur samay milega, kyonki power ka kaata pehle se dheemi gati se upar badhega aur aapko baar-baar vahi power set karne mein madad hogi.

 

(Magnum ka badlaav) → Nishpaksh

 

 

 

Daily Missions Mein Badlaav

Aisa pehli baar nahi ho raha, ye bahut baar ho chuka hai aur iski hume aadat pad gayi hai. Kuch hi dinon pehle ek bahut hi bada update hua tha Daily Missions mein. Jee haan, mai baat kar raha hu us update ki, jiske chalte Daily Missions ko PRO battles mein poora karna asambhav ho gaya. Iska kaaran ye tha, ki kuch khilaadi in missions ka durupyog karte the. Agar Capture 3 flags wale missions ki baat ho, to mujhe sirf PING-PONG ka battle banana hoga, ek dost ko doosre team mein bulaana hota, aur jhatke se 3 flags capture ho jaate. Kaam khatm. Isliye Tanki ne ye sakt kadam uthaya, aur iske liye in missions ke puraskaaron ko 10% se badha bhi diya.

Agar is update ki baat karein, to pata lagega ki ek naye tareeke ka Daily Mission aaya hai, jismein aapko Crystals kamaana hoga, kabhi ek battle mein, ya koi mode wale battle mein, chahe wo CTF ho, DM ho, CP ho ya TDM ho. V-Log ke anusaar ye Missions puraane wale "Earn Experience in Battles" wale Missions se mushkil honge kyonki aapko poora battle khelna hoga, crystals kamaane ke liye. Neeche ek tasveer hai jisse aap anumaan laga payenge ki kis tarah ke missions aap ko aane waale samay mein dikh sakte hai.

 

Baaye se Daaye - Third Lieutenant (), ek Field Marshal () aur ek General () ke missions

Premium ke Naye Taufe

Aap logon ko yaad honge na, wo din (Missions ke aagman se pehle) jab hame pratidin login karne par taufe milte the, Supplies, Crystals, Double Crystal Card ke roop mein? Wo sab laut aaye hai, par sabke paas shayad na pahunch paayein ( :(). Kyonki, sirf Premium users ko ye taufe milenge, jo kuch is prakaar honge.

• 2500 Crystals
• 3 Repair Kits
• 10 Double Armor
• 10 Double Damage
• 10 Speed Boost
• 10 Mines

Ye taufe ek samaan honge, Recruit se lekar Legend tak. Lekin in taufon ko paane ke liye aapko pratidin ek baar login karna hoga. Jaise V-log mein bataaya hai, ab Crystal Packs khareedne se jyaada uchit hoga yadi aap Premium khareed lein :) Saath hi, ye yaad rakhein ki Premium aapko ye taufe hi nahi, balki Battles mein 50% adhik XP points, 100% adhik crystals deta hai. Itna hi nahi, aap XT Equipment khareed sakte hai, bina PRO battle pass ke PRO battles mein jaa sakte hai, unhe bana sakte hai.

 

 

Aap poochenge ki isse khel par kya asar padega? Asar bilkul padega. Ek oor se Premium Buyers ke liye ache sanket hai aur doosri oor dekhein to hamaare jaise bhale logon ke liye bure, kyonki ham kuch khareed nahi sakte. Kuch log kahenge ke ye khel "Pay2Win" wale tag ko haat laga chuka hai. Kai log niraash honge aise Updates se. Apni pratikriya jaroor comments section mein dijiye.

"Communicator Panel" Mein Badlaav

Jab Communicator Panel ka aagman hua, tab khilaadiyon ko ye dikkat thi ki ve shuruaat mein unhe News Panel dikhta, jabki ve chat section ko dekhna chahte the. Lekin, is update ne is pareshaani ko door kar diya hai.

Ab is baat ko yaad rakhte hue, ki pichli baar aapne kaunsa tab dekha tha, agli baar vahi tab aapko dikhayi dega. Saath hi, agar aapne ek khabar ko padh liya hai to aap uspar "Click" kar sakte hai, aur aap dekhenge ki ek hara circle uske oopar se mit jayega. Is tasveer ko dekhiye.

Communicator Panel mein fark karna.
Baye oor khabar hai jise khilaadi ne padha nahi hai, aur dayi oor wali khabar ko khilaadi ne padh liya hai.
 

Kuch Aur Badlaav

Iss Patch Update mein aur bhi kuch badlaav hue the. Chaliye unhe bhi dekhte hai.

CTF Mode ka Naya Flag

Jee haan, ab aapko dikhega ek bahut hi naya flag, CTF mode ke har battle mein. Puraana flag Tanki ke itihaas ka ek bahut hi ehem hissa tha, lekin ise badalna aavashyak ho gaya kyonki jo naya base hai uske saath ye puraana flag acha nahi lagta. Ab jo naya flag aa gaya hai, use ek naya astitva mil gaya hai, aur ab ek kaaran bhi hai, ki wo chamakta kyon hai.

Tasveer V-Log mein se

Magnum ka Power-up Sound Badhaya Gaya

Kuch jyaada kehne ki jaroorat nahi hogi. Magnum ke power-up hone ki awaaz ko badhaane ka to ek hi kaaran ho sakta hai. Aisa is liye taaki Magnum ko aur bhayaanak mazedaar aur 'cool' bana sakein.

Siege Map Mein Badlaav

Ye badlaav kaafi jaroori tha. Video mein ne bataaya tha, ki Siege ke donon bases ek doosre se bahut kareeb the, unke beech mein sirf ek deewar thi. Isliye ek team ko doosre team ko, apne hi base mein phasaane ka mauka mil jaata. Iske kaaran khel boring ho gaya tha, aur naainsaaf bhi lagne laga tha.
Siege mein do badlaav hue.

1. Doosre deewaar ko laana:

Jaise ham jaante hai, is Update se poorv, donon bases ek level ke ridge se vibhaajit the, jise Magnums bahut aasaani se paar kar sakte the. Iska saaf matlab hai, ki jo beech mein ek pahaad jaisi deewaar hai, uske hi upar ek chota sa pahaad aur add kar diya gaya hai. Iske phalswaroop ek base mein rehte hue doosre base par logon ko maarna kathin ho jayega.

2. Bikhre hue Spawn Locations:

Puraane Spawn locations bahut hi vichitra the, aur iska khel par bura prabhaav padta tha. Isliye, ab inmein sudhaar laaya gaya hai. V-log se kuch tasveere prapt hue, jo kuch is prakaar hai:

Red Team ke liye spawn points:

Blue team ke spawn points:

 

 

Bugs hue Door

Ab baat karte hai kuch bugs ki, jo <<Space>> mode ke aane ke baad dikhne lage the.

- Monte Carlo Summer aur Valley <<Space>> ke bugs:

<<Space>> Mode ke aane ke baad, Monte Carlo Summer map ko banaate hi ek bug trigger ho jaata tha. Doosra bug Valley map ki oor gaya, jab bhi Valley <<Space>> banta tha, ye bug aa jaata aur pareshaaniyaan khadi karta tha. In donon ko ab door kar diya hai.

- VKontakte mein Autorization ki Pareshaani:

Aap ki jaankaari ke liye bata de, ki VKontakte Europevaasiyon ka bahut hi mahshoor SN website hai. Iske saath jab aap account banate the, tab ek bug saamne aa jaata tha. Ise bhi ab door kar diya hai.

 

---

 

Nishkarsh

Ab shuru kar hi diya hai to ruke kyon? Hamne dekha ki Patch Update #456 mein kya kya hua. Mere priya mitra aur Hindi Akbaar ke Manager ko mera saath dene ke liye dhanyawaad. Kuch badlaav ache the, jo Turrets mein hue, maps mein hue, Missions mein Crystal Mission ki badhauti, ityaadi. Antatah, ek aur Patch Update poora ho gaya, ham bhi thak gaye, ab vishraam karna chahte hai. To milenge jaroor dobaara! Alvidaaa!!

 

~ Guest Writer

 

Edited June 13, 2017 by Tofu

[Mr.Optimistic 440]

Noice zen.

[asifmak 467]

yar mujhe maloom sahi jagah nahi hai lekin koi zero supply ke bare mai batayega?

[asifmak 467]

aur konse update me introduce hua

[Zenyth 6,494]

Zero supply temporary tha (unless I missed something)

sirf May celebrations ke ant tak tha

[asifmak 467]

oh kya hai na ki kai dinon se chalaya nahi to pata nahi tha

thnx for ur reply and time zen